Башҡортса төбәк диктанты Сибай ҡалаһының ике белем усағында яҙыл­ды. БДУ-ның Сибай институтында уны онлайн режи­мында үткәреү күҙал­ланһа ла, техник сәбәптәр арҡаһында тексты филология фәндәре кандидаты Рида Латипова уҡыны.

Сарала 200-ҙән ашыу кеше ҡат­­нашты, улар араһында студенттар, уҡыусылар, уҡы­тыу­сылар, китапханасылар, оло йәш­тәгеләр ҙә бар ине. Профессор, филология фәндәре кандидаты Ғәҙилә Бүләкова әйтеүенсә, акция бик урынлы һәм файҙалы. Туған теленең матурлығын той­ған, уның нескә­лектәрен белгән кешегә әлеге һынау әллә ни ауыр­лыҡ тыуҙырмай, тине ул.
30 йылдан ашыу диктант яҙ­ғаны булмаған Нәзирә Килде­йәрова үҙенсәлекле, “үҙе­беҙсә, саф башҡортса” сараны көтөп алған. Акцияға уҡыу­сы­ларҙың да дәррәү ҡушылыуы ҡыуаныслы. Ҡаланың 10-сы мәк­тә­­бенән ба­лаларҙы диктант яҙыр­ға баш­ҡорт теле һәм әҙә­биәте уҡытыу­сыһы Алмабикә Шахмөхәмәтова алып килгән. IX класс уҡыусыһы Рәм­зил Ыласынов туған телен яҡшы белеүе һәм диктантты хатаһыҙ яҙасағы хаҡында ышаныс менән әйтһә, уның һабаҡ­ташы Зарина Игишева ла өмөтлө йылмайҙы.
Диктант яҙыусылар араһында урыҫ телендә аралашҡан сту­денттарҙың, уҡы­тыусыларҙың да булыуы иғтибарға лайыҡ. Туған теленән белемен һынап ҡарарға теләүселәр юҡ түгел, тимәк. Тик ра­йондарҙан да күпләп саҡы­рырға ине халыҡты – ойоштороу­сыларға уйланырға урын бар.
Ҡала хакимиәтенең мәғариф бүлегендәге туған телдәр буйын­са методист Айһылыу Мотал­лапованың тырышлығы менән Рамазан Өмөтбаев исемендәге башҡорт лицейында уҡыусылар, ата-әсәләр, уҡытыусылар ҙа башҡортса диктант яҙҙы. Улар яҙма эш башҡарып ҡына ҡал­маны, бер аҙға мәктәп йылдарына әйләнеп ҡайтып, хә­тирә­ләрен яңыртты.