Башҡорт халҡын бар донъяға танытҡан, борон-борондан табындарҙы йәмләгән, дауалауҙа йыш ҡулланылған балыбыҙҙы етештереү менән шөғөлләнгән эшҡыуарҙар республикабыҙҙа байтаҡ.


Мәләүез районының Ағиҙел буйында урынлашҡан хозур тәби­ғәтле Тамъян ауылында уңған, тырыш халыҡ йәшәй. Береһенән-береһе төҙөк, яңы өйҙәр, ихаталар... Шундайҙарҙың береһендә беҙҙе бик мөләйем хужалар – Гөлсөм менән Әлтәф Хәмзиндар – ҡаршы алды.
Әлтәф Зөфәр улы бәләкәй са­ғынан уҡ өләсәй-олатай­ҙарының умартасылыҡ кәсебен күреп, был эштең асылына төшөнөп үҫә. Рабиға өләсәһе һуғыш йылдарында уҡ ҡорт күсе тотҡан булһа, Заһир олатаһы колхозда ошо уҡ өлкәлә көс түгеп, шөғөлдө балаларына ла өйрәткән. Әлтәф Хәмзин да кәсепкә ныҡлап тотонған: заманында Рәшит аға­һынан бер күс ҡорт алған, хәҙер иһә уларҙың һаны 70 – 80-гә еткән. Ҡыш­ты ҡорттар ҡәҙимге йорт баҙында үт­кәрә. Май айы етеп, көндәр ма­ту­райыу менән умарталар Нөгөш бу­йындағы Һәргәй ауылына күсерелә.
– Йәйләү өсөн сәскәле, шишмәле, уңайлы урыныбыҙ бар. Эргәлә генә – йүкәлек. Һәр умартаға етди иғтибар бүленә. Улдарыбыҙ Илвир менән Альберт ныҡ ярҙам итә. Ҡорт айырыу башланһа, яңы урын әҙерләнә, – тип эше хаҡында яратып бәйән итә Хәмзиндар.
Уңған ғаилә район, республика күр­гәҙмәләрендә әүҙем ҡатнаша, маҡ­тау грамоталары, ветерандар исеменән килгән рәхмәт хаттары, продукция сифаты өсөн тапшы­рылған сертификат – ихлас хеҙмәт һөҙөмтәләре.
Бөрйән, Нөгөш балы таҙалығы, затлылығы менән киң билдәле. Тимәк, эштән ҡурҡмай, уны тырышып башҡарһаң, ауылда ла бынамын итеп йәшәп була.