Балтас районының Ҡомъяҙы ауылында йәшәгән Илнур Усманов кеүек аяғында ныҡ баҫып торған ир-егеттәр һоҡландырмай ҡалмай. Утыҙҙы аша атлаған йәш кеше кемгәлер бил бөгөүҙе кәрәк тип тапмаған, тотҡан да үҙ эшен башлаған. Былтыр яҙ ул крәҫтиән (фермер) хужалығы ойоштороп ебәреп, ун биш тана һатып ала.
Илнурҙың хужалығына эш бө­төүгә генә килеп туҡтаныҡ: һы­йырҙар һа­уылған, малға ашар­ға һалынған, быҙауҙарға һөт эсерелгән. Мартта һыйырҙары быҙаулай башлаған – ҡурала туғыҙ быҙау уйнаҡлай ине. Йәш мал өсөн Илнур йылы, иркен һарай һалған. Бесәнен дә мул әҙер­ләгән: 250 төк өйөлөп ята.
– Әлеге көрсөк заманында бындай яуаплы эшкә тотон­ға­ныңа үкенмәй­һеңме? Һөҙөмтә­һе нисек?
– Былтыр ошо мәлдә көнөнә 24 литр һөт һауып ала инек. Быйыл инде – 100 литр самаһы. Быҙауҙарға ҡал­дырып, ҡалға­нын халыҡҡа һата­быҙ. Һөттән генә көнөнә ике мең һум­дан ашыу килем алабыҙ. Әл­бит­тә, ышаныслы ярҙамсыларың, ар­ҡа­ланыр кешең булмаһа, бындай эште ат­ҡа­рыуы еңел түгел. Үҙебеҙҙең трактор ҙа, комбайн да бар. Атайым Радик ғүмер буйы колхозда механизатор булып эшләне, шуға техника­ны көйләүсе лә эргәлә. Һы­йыр­ҙарҙы ҡатыным Ләйсән һауа. Уның эшен еңелләштерер өсөн һауын аппараты алдыҡ. Килә­сәктә иһә малды ишәй­тергә уйлайым. Һөт ризыҡтарынан тыш, ит етеш­терергә була, – тип һөйләй ул.
Был йәш ғаилә күптәргә өлгө бу­лырлыҡ: эш, аҡса юҡлыҡҡа зарланып ултырмай, ҡура тул­ты­рып мал-тыуар үрсетеп, көнө-тө­нө хәләл көс менән тор­мош­тарын алға һөрәләр. Донъя­ларына йәм өҫтәп ҡыҙ­ҙары Камилә, улдары Фәнис менән Раил үҫеп килә. Улар ҙа ҡул ара­һына инеп, ата-әсәһенә ярҙам­лашырға ашҡынып тора.
Яңы эш башлаған фермерға яр­ҙам рәүешендә бер мил­лион һум­лыҡ грант бирәләр. Усма­нов­­тарҙың үҙ хужалығын булды­рыу­ға бер йыл ғына ваҡыт үтһә лә, күҙгә күренерлек һөҙөмтә бар.
Ғаилә башлығы әйтмешләй, көс сы­ғармайынса, уңыш кил­мәй. Тир түгеп яуланғаны татлы ла була уның.