Өфөлә 13 тапҡыр Паралимпия, 18 тапҡыр донъя, 48 тапҡыр Европа чемпионы, еңел атлетика буйынса атҡаҙанған спорт мастеры Рима Баталованың II “Милләт йәштәре” йәмәғәт премияһы лауреаттары бүләкләнде.

Быйыл конкурс Рима Баталованың “Милләт йәштәре” төбәк йәмәғәт фонды тарафынан республиканың Хеҙмәт һәм халыҡты социаль яҡлау министрлығы менән берлектә “ МегаФон” компанияһы ярҙамында уҙғарылды. Ул мөмкинлектәре сикләнгән иң яҡшы йәш спортсыларҙы, тренерҙарҙы, инвалид бала тәрбиәләгән һәм спорт яратҡан йәш ғаиләләрҙе, хәйриә менән шөғөлләнеүселәрҙе, шулай уҡ инва­лидтарҙың проблемаларын яҡтыртҡан киң мәғлүмәт сараларын асыҡлауҙы маҡсат итеп ҡуя.
Бәйгегә Башҡортостандың биш ҡала­һынан һәм 15 районынан 100-ҙән ашыу ғариза тапшырылғайны. Еңеүселәр ете номинацияла билдәләнде. Һөҙөмтәлә “Йыл алға китеше” номинацияһында былтыр йөҙөү буйынса Рәсәй чемпионатында икенсе урынды яулаған Ксения Трякина иң яҡшыһы тип табылды. “Икһеҙ-сикһеҙ спорт” номинацияһында Екатерина Корнеева, Богдан Мозговой, Артур Сәйфетдинов еңеп сыҡты. “Паралимпия спорты өмөтө” тип Анна Крившина танылды. “Еңеү сере”н тренерҙар Ольга Байракова, Сергей Трухачев һәм Вячеслав Шамаев асты. “Чемпион тәрбиәләү” номинацияһында Өфөнән Булатовтар ғаиләһе еңеүсе тип танылды. Сергей Алешин, Флүр Ғәлләмов һәм Ян Левит “Йөрәк ауазы буйынса” номина­цияһында алдынғылыҡҡа өлгәште. Инвалидтарҙың проблемаларын яҡтырт­ҡан өсөн төп премия “Белебеевские известия” гәзите, “Юлдаш” радиоһы һәм “Горобзор” порталы коллективтарына тапшырылды.