Беҙ, Башҡорт дәүләт университеты башҡорт филологияһы һәм журналистика факультетының III курс студенттары, башҡорт теле һәм әҙәбиәте буйынса педагогик практикабыҙҙы тамамланыҡ.

Һөнәребеҙҙе ысынбарлыҡта башҡарып ҡарау өсөн Сибай, Ишембай, Белорет ҡала­ларындағы башҡорт мәктәптәренә, Өфөнөң Рә­ми Ғарипов, Ф. Мостафина исемендәге башҡорт гимназияларына юлланабыҙ. Өсөбөҙгә – Гөлфи­рә Вәлиеваға, Нурания Билаловаға һәм миңә – 1-се башҡорт республика гимназия-интернатын­да практика үтеү бәхете тейҙе. Унда иһә беҙҙе бик йылы ҡаршыланылар, эш тә йылдам барҙы.
Тәүге аҙнала гимназия мөхите менән та­ныш­тыҡ, М. Аҡмулла исемендәге Башҡорт дәүләт педагогия университетынан, Стәрлетамаҡ ҡалаһынан килгән практиканттар менән аралашып, байтаҡ файҙалы мәғлүмәт, ғилем алдыҡ.
Уҡытыусы эшенең барлыҡ нескәлектәрен асып һал­ған Рәсимә Миңләхмәт ҡыҙы Алла­моратоваға оло рәх­мә­тебеҙҙе белдерәбеҙ. Гимназия уҡыусыларының бе­лем кимәле юғары булыуы ла практикаға йәм өҫтәне. Төрлө әҙәби-мәҙәни саралар йыш үткәрелде. Рәми Ға­риповтың тыуыуына 83 йыл тулыуға арналған митинг, халыҡ яҙыусыһы Ноғман Мусин менән осрашыу, егеттәр араһында “Уралтау бөркөт­тәре”, отҡор һәм ғилемлеләр өсөн “Мөғжизәләр яланы” уйыны ҡатнашыусыларҙы ла, тамашасы­ларҙы ла битараф ҡалдырманы.
Практика үтеү байтаҡ ҡатмарлы һынау бул­ды, хаталар аша өйрәндек, методика буйынса белемебеҙҙе нығыттыҡ. Туған универ­си­те­ты­быҙҙан уҡытыусылары­быҙ Зәкиә Мыр­ҙағолова, Рәмзиә Мостафина, етәксебеҙ профессор Ми­рас Иҙелбаев асыҡ дәрестәребеҙгә килде, үҙ баһаһын ҡуйҙы, кәңәштәре менән ярҙам итте.
Бер-беребеҙгә өйрәнеп киткән уҡыусыла­ры­быҙ, ос­таз­дар менән хушлашыуы еңел булманы. Белем уса­ғының йылы, рухлы мөхите үҙенә тартып, һаман да һағындыра. Рәхмәт һиңә, Рәми Ғарипов исемендәге 1-се башҡорт республика гимназия-интернаты!