Ҡайһы бер йүнселдәр шәхси эштәрен район үҙәгендә, шулай уҡ ҡалала йәйелдерергә теләй, икенселәр иһә, киреһенсә, ауыл ерен һайлай. Тәүгеләрен аңларға була: ҡайҙа халыҡ – шунда аҡса, килемде мөмкин тиклем күберәк алаһың. Ә тәрәндән уйлағанда, ҡайҙа ла табышлы эшләргә мөмкин. Бала Сытырман ауылындағы һөт заводы директоры Геннади ЧАНГЕЛИЯ үҙ миҫалында ошо хәҡиҡәтте иҫбат иткән. Уның һөйләгәндәре күптәргә фәһем булырлыҡ.
– Шәхси эшемде бер нисә йүнәлештә көйләгәнмен – ҡыра­ғай баҙар шарттары шуны талап итә. Айырыуса һөт эшкәртеүҙән яҡшы табыш килеүенә инандым. Эргә-тирә райондарҙан, шулай уҡ үҙебеҙҙәге хужалыҡ­тарҙан тәүлегенә 20 тоннаға яҡын һөт ҡабул итеп эшкәртәм. Тәүге осорҙа һөт, ҡаймаҡ, ҡатыҡ менән сикләнһәк, йылдан-йыл продукцияны төрләндерергә ты­рыштыҡ, был ысул әле лә дауам итә. Ҡатыҡ, эремсек, ҡуйыр­тыл­ған һөт – шуға миҫал. Кәштәлә һөт ризыҡтары төрлө булған һайын һатып алыусылар ҙа ар­та. Тәүҙәрәк, ҡаймаҡ ҡына тәҡ­дим иткәндә, өлкән йәштәге бер ағайҙың “Эремсек эшләп ҡара­ға­нығыҙ булманымы?” тигән һо­рауы күңелемә тынғылыҡ бир­мәне. Күп тә үтмәне, был эшкә ныҡлап тотондоҡ. “Хә­йерле иртә!” тигән яҙыулы һөт ризыҡтарын етештереүҙе башлап ебәрҙек. Әйткәндәй, ошонан һуң тауар баҙарҙа айырыуса шәп үтә башланы. Иртән торғас та нимә тип өндәшәбеҙ? Әл­биттә, туғандарға, дуҫ-ишкә көнө яҡшы уҙһын өсөн ихлас сәләм бирәбеҙ.
Бала Сытырманда йәшәгән­дәрҙең бер нисәүһе бында эш­ләй. Йәмғеһе 18 кешене эш менән тәьмин иттем, киләсәктә тағы ла аласаҡмын. Хеҙмәт­кәрҙәремдән Оксана Мазлова, Илһам Кинйәбаев, Елена Фәт­ҡуллина, Тамара Дегтярева, Дилара Әхмәрова – бүтәндәргә өл­гө. Тырыштар өҫтәмә түләү­ҙәр алып ҡыуана. Ә ниңә ундай­ҙарҙы дәртләндермәҫкә!?
Бинаны төҙөп ултыртҡас та, тирә-яғын йәшелләндереүгә ва­ҡыт бүлдем. Тәртип тупһанан баш­лана бит. Юғиһә предприя­тиеға килгәндәрҙә кире ҡараш тыуыуы ихтимал. Киләсәктә был урынды гөл баҡсаһына әйлән­дереү өсөн тырышасаҡбыҙ.
Сыр яһау уйы менән дә янабыҙ, уны тиҙҙән кәштәләрҙә күрерһегеҙ.