Республика Башлығы Рөстәм Хәмитов Ҡытай Халыҡ Республикаһының Рәсәйҙәге илсеһе Ли Хуэй менән осрашты. Улар сәнәғәт, сауҙа иҡтисады, инновация, ғилми хеҙмәттәшлек хаҡында фекер алышты, ике аралағы бәйләнештәрҙе нығытыу мәсьәләләрен өйрәнде.

– Ҡытай – ышаныслы партнерыбыҙ. Иҡти­садты ғына алып ҡарайыҡ – ике республика араһындағы тауар әйләнеше яҡынса 700 мил­лион долларға етте, – тине Рөстәм Зәки улы. – Ҡытай компаниялары Башҡортос­танда үҙҙәрен күптән танытты. Мәҫәлән, элемтә сараларын етештергән “Хуавэй” компания­һы­ның беҙҙең эшҡыуарҙар менән берлектәге проекты 20 йылдан ашыу уңышлы эшләй. Ғөмүмән, бындай миҫалдар бихисап.
Башҡортостан Башлығы билдәләүенсә, һуңғы йылдарҙа Ҡытай Халыҡ Республика­һының провинциялары менән бәйләнеш ны­ғый. Әле 200-ҙән ашыу инвестиция проекты өйрәнелә, алдағы ике-өс йылда ҡайһы берҙә­ренең тормошҡа ашыры күҙаллана.
– Хеҙмәттәшлек алып барылған йүнә­леш­тәр бик күп. Барыһы ла тотороҡло, тиҙ үҫә. Пландар ҙа ҙур. Бынан тыш, Ҡытай Халыҡ Рес­публикаһы эшҡыуарҙарына урындағы предприятиелар етештергән ҡоролмаларҙы, технологияларҙы ла тәҡдим итергә әҙербеҙ, – тине Рөстәм Хәмитов.
Хеҙмәттәшлектең яңы мөмкинлектәр асыуын илсе Ли Хуэй ҙа билдәләне.
— Күп мәсьәләләр буйынса Башҡортостан менән уртаҡ тел табыуыбыҙға бик шатбыҙ. Киләсәктә хеҙмәттәшлекте тағы ла киңәйтер­гә иҫәп тотабыҙ, – тине ул.
Рөстәм Хәмитов менән Ли Хуэй ШОС һәм БРИКС саммиттарына әҙерлек тураһында ла фекер алышты.