Бурыстарын ҡасан түләрҙәр?

Ағиҙел ҡалаһында фатир хужаларының торлаҡ-коммуналь хеҙмәттәре өсөн 20 миллион һумға яҡын бурысы бар.
Түләмәүҙең төп сәбәбе – эшһеҙлек, тимәк, аҡсаһыҙлыҡ. Һуңғы айҙа ғына бурыслыларҙың һаны 601 кешегә артҡан. Һөҙөмтәлә торлаҡ-коммуналь хужалығы предприятиеһының йорттарҙы йылытыуға, һыу селтәрҙәрен, ҡыйыҡтарҙы ремонтлауға аҡсаһы етмәй.


Уңғандарҙан өлгө алығыҙ

Туймазы районы ҡаҙнаһының дүрттән бер өлөшөн бәләкәй һәм урта эшҡыуарлыҡ менән шөғөлләнеүселәр тулыландыра.
Үҙ эшен асырға теләгәндәргә ярҙам күрһәтелә. Халыҡты эш менән тәьмин итеү үҙәге аша, мәҫәлән, һуңғы йылдарҙа 123 кеше субсидия алған. Маҡсатлы федераль программа буйынса төбәккә 8 миллион һум самаһы аҡса бүленгән. Элекке уҡытыусы-психолог Светлана Мөхәмәтйәрова Туҡтағол ауылында икмәк бешереү цехын ойошторған. Галина Гәрәева иһә хеҙмәтләндереү өлкәһендә көсөн һынай — кейем-һалым тегеү һәм йүнәтеү менән шөғөлләнә. Уңған ҡатын алты кешегә эш урыны булдырған.


Эх, данлы минуттар...

Валентиновка ауыл мәҙәниәт йортонда ойошторолған “Дан минуты” бәйгеһенең тәүге турында Успенка, Сәғит, Михайловка, Үрге Ләмәз, Казанка ауылы вәкилдәре һәм урындағы оҫталар ҡатнашты.
Сығыштарҙың төрлөһө булды – йырланылар, бейенеләр, акробатик этюдтар ҙа күрһәттеләр. Шуныһы ҡыуаныслы: сәхнәгә сыҡҡандар араһында балалар ҙа, йәштәр ҙә, ололар ҙа бар ине.
Бәйге алты турҙа үтәсәк, ҡатнашыусыларҙың барыһына ла ҡиммәтле бүләктәр тапшырыласаҡ. Төп бүләк – 10 мең һум аҡса – иң сағыу сығыш яһап, еңеү яулаған талант эйәһенә биреләсәк.


Һалҡынға бирешмәйҙәр

Район хужалыҡтарында мал ҡышлатыу уңышлы бара.
Ҡыштың бауыры оҙон, әммә “Аҡбуҙат” предприятиеһындағы йылҡы малы сатлама һыуыҡтарға бирешмәй – 80 баш мал яҙға юғалтыуһыҙ сығасаҡ. Былтыр үлән мул булды: хужалыҡ эшсәндәре 240 тонна бесән әҙерләгән. Ғәмәлдә, был ике ҡышҡа етерлек. Ат ҡараусылар тиҙҙән дүрт тиҫтәгә яҡын ҡолонсаҡ та аласаҡ.


Һәр кемдең аралашырға хоҡуғы бар

Октябрьский ҡалаһының 2-се китапханаһында һуҡыр һәм насар күреүсе кешеләр өсөн тифлоүҙәк асылды.
Тифлотехнологиялар компьютер мәғлүмәтен мөмкинлектәре сикләнгән кешеләргә тауыш, рельеф-нөктә, эре текст ярҙамында еткерергә ярҙам итә, тимәк, Интернет менән ҡулланыу даирәһе лә киңәйә. Тифлоүҙәк булдырыу өсөн урындағы ҡаҙнанан 1 миллион 140 мең һум аҡса бүленгән.


Шылтыратыуҙарға шикләнеп ҡарағыҙ

Йыл башынан Салауат ҡалаһында телефон һәм башҡа төрлө мутлыҡтарҙың артыуы күҙәтелгән: 11 кеше дөйөм алғанда 150 мең һум аҡсаһынан ҡолаҡ ҡаҡҡан. Күпселек осраҡта оло йәштәгеләр енәйәтселәрҙең ҡорбаны була.
Миҫал өсөн, 85 йәшлек инәйгә бер кеше килеп, үҙен ҡала хакимиәте вәкиле тип таныштырған. Ул ҡала ҡаҙнаһынан оло йәштәге кешеләргә автомобиль бүленеүен, уларҙың бушлай таратылыуын һөйләгән. “Ҡорос ат” хужаларына, йәнәһе, юл сығымдарын ғына – 7,5 мең һум – ҡапларға кәрәк. Инәй, әлбиттә, ҡыуанысынан ялған документтарға ҡул ҡуйып, аҡса тоттороп ебәргән. Берәү иһә, үҙен полиция хеҙмәткәре тип таныштырып, артыҡ ышаныусан ирҙән абонент һанына 3,5 мең һум аҡса күсертеүгә өлгәшкән.


Рөхсәтһеҙ һунар итһәң...

Ейәнсура районында 28 йәшлек һунарсыға ҡарата енәйәт эше асылған.
Ул лицензияһы булмай тороп, ҡыр ҡабанын атҡан һәм тәбиғәткә 170 мең һумлыҡ зыян килтергән.
Былтыр республикала 190 браконьер тотолған, 65 енәйәт эше ҡуҙғатылған, законһыҙ әйләнештән 100 мылтыҡ һәм 110 һунар йыһазы тартып алынған.