Хөкүмәт йортонда Башҡортостан Башлығы Рөстәм Хәмитов бәләкәй һәм урта эшҡыуарлыҡ вәкилдәре менән осрашты.

Сарала эшҡыуарҙар, дәүләт власы органдары, йәмәғәт ойошмалары, кредит учреждениелары вәкилдәре ҡатнашты. Осрашыу ба­рышында предприятиеларҙың эш һөҙөмтә­лелеген яҡшыртыу, власть менән бизнестың үҙ-ара эш итеүе буйынса тәҡдимдәр тикшерелде.
– 2015 йылдың ике айы йомғаҡтарына ҡарағанда, сәнәғәт етештереүе күләме арта. Былтырғы ғинуар-февраль менән сағыштыр­ғанда, 3,6-3,7 процентҡа үҫеш күҙәтелә. Март­та ла борсолорға урын юҡ кеүек. Шул уҡ ваҡытта предприятиеларҙың финанс күрһәт­кесе түбәнәйә. Был республика ҡаҙнаһына ингән һалым керемдәрендә сағылыш тапмай ҡалмай, — тине Рөстәм Хәмитов. — Бындай шарттарҙа йылдамлыҡ күрһәткән бәләкәй һәм урта эшҡыуарлыҡҡа ҙур өмөт бағлайбыҙ.
Башҡортостан Башлығы әйтеүенсә, эшҡы­уар­лыҡҡа һалым баҫымын кәметеү, яңы асыл­ған предприятиелар өсөн ташламалар биреү һөҙөмтәһендә республика ҡаҙнаһы 3-4 миллиард һумды юғалтыуы ихтимал.
Алып еткерелмәгән килем мәсьәләләрен хәл итеү өсөн республика Башлығы дәүләт структураларын ҡулайлаштырырға, ҡайһы бер йүнәлештәрҙә ҡәтғи экономия алымын ҡулланырға тәҡдим итте.