(Т. Бәширова, “Әкиәтме был? Оятһыҙлыҡ!”,
2015 йыл, 23 ғинуар)

Өфөнөң Октябрь районы хакимиә­тенән Рәми Ғарипов исемендәге 1-се башҡорт республика гимназия-интернаты ҡаршы­һындағы “Әкиәт” магазинында араҡы һа­тылыуы тураһындағы хатҡа яуап алдыҡ. Унда шулай тиелә:
“Мөрәжәғәтте асыҡлап, хакимиәт бел­гестәре был сауҙа нөктәһен барып тикшерҙе, уның 2006 йылдың 31 авгусында бирелгән һәм 2016 йылдың 30 авгусына тиклем ғәмәлдә ҡаласаҡ 682-се лицензияға ярашлы эшләгәне асыҡ­ланды.
Өфө ҡала Советы ҡарарына ярашлы балалар, мәғариф, медицина ойошмаларынан һәм спорт объекттарынан 25 метр алыҫлыҡта урынлашҡан кибет­тәрҙә иҫерткес эсемлектәр һатырға мөмкин. “Әкиәт” сауҙа нөктәһенән Рәми Ғарипов исемендәге 1-се башҡорт республика гимназия-интернатына тиклем ара иһә 30 метр тәшкил итә”. Октябрь районы хакимиәте башлығы урынбаҫары А. Ғафаров ҡул ҡуйған яуаптан аңла­шы­лыуынса, ошо “артыҡ” 5 метр арҡаһында бөгөн “Әкиәт”тә иҫерткес эсемлектәр менән сауҙа итеүҙе тыйып булмай. Ысынлап та, әкиәт бит был!
Шул уҡ ваҡытта белем усағынан юл аша ғына урынлашҡан был кибеткә инеп сыҡмаған уҡыусы бик һирәк. Ундағы теҙе­леп киткән һыра-хәмер, тәмәке кәштәләре йәштәрҙең киләсәгенә насар тәьҫир яһамаҫмы?! Ҡала Советы депутаттары ошо хаҡта нимә уйлай икән?

Гәзит ваҡытында килһә генә ҡәҙерле

(Р. Зиннуров, “Рухи аҙыҡтан мәхрүм итмәһендәр ине”,
2015 йыл, 30 ғинуар)

Уҡыусыбыҙҙың гәзитте бик һуңлатып алып килеүҙәре тураһындағы мөрәжә­ғә­те буйынса “Рәсәй почтаһы”ның Баш­ҡорт­­остан филиалы вәкилдәре урында тик­шереү үткәргән. Хәҙер баҫма тейешле ваҡытта таратыла. Ә Мәсәғүт почта бү­лек­сәһенең эш сифаты күҙәтеүгә алын­ған.