2015 йыл, 10 март № 67
2011 — 2015 йылдарҙа “Асыҡ мөхит” айырым маҡсатлы республика программаһының ҡайһы бер сараларын тормошҡа ашырыу йәһәтенән юридик берәмектәргә субсидия биреү тәртибен раҫлау тураһында
Рәсәй Федерацияһы Бюджет кодексының
78-се статьяһына ярашлы, Башҡортостан Республикаһы Хөкүмәте ҡарар итә:
1. 2011 – 2015 йылдарҙа “Асыҡ мөхит” айырым маҡсатлы республика программаһының ҡайһы бер сараларын тормошҡа ашырыу йәһәтенән юридик бе­рә­мектәргә субсидия биреүҙең теркәлгән тәртибен раҫ­ларға.
2. 2011 – 2015 йылдарҙа “Асыҡ мөхит” айырым маҡ­сатлы республика программаһының ҡайһы бер сараларын тормошҡа ашырыу йәһәтенән юридик бе­рә­мек­тәргә субсидия биреүгә бюджет аҡсаһын төп бүлеүсе тип Башҡортостан Республикаһының Транспорт һәм юл хужалығы буйынса дәүләт комитетын билдәләргә.
3. Ошо ҡарарҙың үтәлешенә контролде Башҡорт­остан Республикаһының Транспорт һәм юл хужалығы буйынса дәүләт комитетына йөкмәтергә.
Башҡортостан Республикаһы Хөкүмәте Премьер-министрының беренсе урынбаҫары
Р.Х. МӘРҘӘНОВ.

Башҡортостан Республикаһы Хөкүмәтенең 2015 йылдың 10 мартындағы 67-се ҡарары менән раҫланды

2011 – 2015 йылдарҙа “Асыҡ мөхит” айырым маҡ­сатлы республика программаһының ҡайһы бер сараларын тормошҡа ашырыу йәһәтенән юридик берә­­мек­тәргә субсидия биреү тәртибе
1. Ошо тәртип Башҡортостан Республикаһы Хө­күмәтенең 2011 йылдың 28 апрелендәге 130-сы ҡарары (артабанғы үҙгәрештәре) менән раҫланған 2011 – 2015 йылдарҙа “Асыҡ мөхит” айырым маҡсатлы республика программаһының ҡайһы бер сараларын тормошҡа ашырыу йәһәтенән юридик берәмектәргә субсидиялар (артабан – субсидия) биреү механизмын билдәләй һәм түбәндәгеләрҙе асыҡлай:
субсидия алыуға хоҡуҡлы юридик берәмектәр категорияһын;
субсидия биреү маҡсатын, шарттарын, тәртибен;
субсидия биреү тураһындағы договорҙар менән ҡаралған осраҡтарҙа субсидияны алыусылар тарафынан быйылғы финанс йылында файҙаланылмаған аҡса ҡалдығын кире ҡайтарыу тәртибен;
субсидияны биргәндә тейешле шарттар боҙолған ос­раҡта уны тейешле бюджетҡа кире ҡайтарыу тәр­тибен;
Башҡортостан Республикаһының Транспорт һәм юл хужалығы буйынса дәүләт комитеты (артабан – Дәүләт комитеты) һәм дәүләт финанс контроле органдары тарафынан субсидия алыусыларҙың уны биреү шарттарын, маҡсаттарын һәм тәртибен үтәүен мотлаҡ тик­шереү тураһындағы положениены.
2. Субсидия милек хоҡуғында, шул иҫәптән хужалыҡ алып барыу хоҡуғында автовокзалдарға (йәки) автостанцияларға (артабан – транспорт инфраструк­тураһы объекттарына) эйә булған һәм түбәндәге критерийҙарға яуап биргән юридик берәмектәргә (дәүләт (муниципаль) учреждениеларынан тыш) (артабан – ойошмаларға) бирелә:
ғариза биргән көнгә транспорт инфраструктураһы объекты ойошма тарафынан кәмендә бер йыл тәғә­йен­ләнеше буйынса файҙаланылырға тейеш;
транспорт инфраструктураһы объекты Башҡортос­тан Республикаһы биләмәһендә урынлашырға тейеш;
ойошманы үҙгәртеү, бөтөрөү көтөлмәҫкә, ул ҡану­ниәт менән билдәләнгән тәртиптә бөлгөнлөккә төшкән тип танылмаҫҡа тейеш.
3. Субсидия биреүҙең маҡсаты – ойошмаларҙың Башҡортостан Республикаһында транспорт инфра­струк­тураһы объекттарын һәм уларға яҡын билә­мә­ләрҙе инвалидтар һәм халыҡтың башҡа аҙ хәрәкәтсән төркөмдәре өсөн яраҡлаштырып, уларҙың йәшәйеше өсөн уңайлы шарттар булдырыуға, шул иҫәптән тү­бәндәгеләргә йүнәлтелгән сығымдарын финанс тәьмин итеү:
ишетеү һәм күреү һәләте түбән булған кешеләр өсөн яҡтылыҡ һәм тауыш мәғлүмәттәре сағылдырылған билдәләр ҡуйыу;
йәмәғәт бәҙрәфтәрендәге кабиналарҙы йыһазлан­дырыу;
биналарҙы пандустар һәм башҡа махсус ҡулай­ла­малар менән йыһазландырыу;
инвалидтарҙың автотранспорты өсөн махсус ҡуналҡа урындар булдырыу.
4. Субсидия биреү шарттары:
ойошманың ошо тәртиптең икенсе пунктында күрһәтелгән талаптарға яуап биреүе;
ойошма тарафынан ошо тәртиптең 6-сы пунктында күрһәтелгән документтарҙы тапшырыу.
5. Субсидия биреү буйынса сығымдарҙы финанс тәьмин итеү билдәләнгән тәртиптә Башҡортостан Республикаһы бюджетында ҡаралған, шул иҫәптән федераль ҡаҙнанан бүленгән субсидия финанс тәьминәт сығанағын тәшкил иткән аҡса иҫәбенә тормошҡа ашырыла.
Субсидия Башҡортостан Республикаһы бюджеты­ның йыйылма исемлеге нигеҙендә Дәүләт комитетына раҫланған бюджет йөкләмәһе лимитына ярашлы бирелә.
Федераль бюджеттан бүленгән аҡса иҫәбенән бул­ған субсидия билдәләнгән тәртиптә Дәүләт комите­ты­ның Федераль ҡаҙналыҡтың Башҡортостан Рес­публи­каһы идаралығында асылған шәхси иҫәбенән субси­дия алыусыларҙың кредит ойошмаларында асылған иҫәбенә күсерелә.
Башҡортостан Республикаһы бюджеты аҡсаһы иҫәбенән булған субсидия билдәләнгән тәртиптә Дәүләт комитетының Башҡортостан Республикаһы Финанс министрлығында асылған шәхси иҫәбенән ойошмаларҙың кредит ойошмаларында асылған иҫәбенә күсерелә.
6. Субсидия алыу өсөн ойошмалар ошо йылдың 1 но­ябренә тиклем Дәүләт комитетына Рәсәй Феде­рацияһы ҡануниәте талаптарына ярашлы, ошо пункт менән билдәләнгән документтарҙың күсермәһен теркәп, электрон төрҙә һәм электрон ҡултамға менән субсидия алыуға ғариза (артабан – ғариза) бирә.
Ғаризала транспорт инфраструктураһы объектының урынлашҡан ере, планлаштырылған саралар исемлеге, күҙалланған сығым күләме күрһәтелә.
Ғаризаға түбәндәге документтар теркәлә:
а) ғариза биргән көнгә һалым органынан Рәсәй Фе­дерацияһының һалымдар һәм йыйымдар тураһындағы ҡануниәтен боҙған өсөн һалым, йыйым, пеня һәм штраф түләү йәһәтенән бурыстың булмауы тура­һын­дағы белешмә ҡағыҙы;
б) һалым органында иҫәпкә ҡуйылыу тураһындағы таныҡлыҡтың күсермәһе;
в) ойоштороу документтарының (уставтың, ойоштороу договорының) раҫланған күсермәләре;
г) юридик берәмек сифатында дәүләт теркәүе тураһындағы таныҡлыҡтың раҫланған күсермәһе һәм юридик берәмектәрҙең Берҙәм дәүләт реестрынан өҙөмтә;
д) транспорт инфраструктураһы объекты ойошма­һының милек хоҡуғын раҫлаған документ (милек хоҡуғын, хужалыҡ алып барыу хоҡуғын дәүләт теркәүе тураһындағы таныҡлыҡ);
е) кешенең ғариза биреүсе исеменән субсидия алыуға вәкәләтен раҫлаған документ.
“Дәүләт һәм муниципаль хеҙмәт күрһәтеүҙе ойоштороу тураһында”ғы Федераль закондың 7-се статьяһын­дағы 6-сы өлөш менән ҡаралған осраҡтарҙан тыш, ғариза биреүсе ошо пунктта күрһәтелгән документтар йәки уларҙағы мәғлүмәттәр дәүләт органдары, урын­дағы үҙидара органдары йә иһә уларға буйһонған ойошмалар ҡарамағында булһа, был документтарҙы тәҡдим итмәҫкә хоҡуҡлы.
Ғариза биреүсенең шәхси инициативаһы буйынса бындай документтар тәҡдим ителмәгән осраҡта, улар йәки был документтарҙағы мәғлүмәттәр ведомство-ара бәйләнеш тәртибендә тейешле дәүләт органдарынан, урындағы үҙидара органдарынан йәки уларға буй­һонған ойошмаларҙан һоратып алдырыла.
Документтарҙың күсермәһе ойошма тарафынан раҫлана.
7. Дәүләт комитеты килгән ғаризаларҙы һәм уларға теркәлгән документтарҙы тейешле срок тамамланған көндән биш эш көнө эсендә ҡарай, субсидия биреү йәки уны биреүҙән баш тартыу тураһында ҡарар ҡабул итә. Ҡарар ҡабул ителгәндән һуң бер эш көнө эсендә Дәүләт комитеты ойошмаға ҡабул ителгән ҡарар тураһында яҙма белдереү һәм ул ыңғай булған осраҡта – субсидия биреү хаҡындағы договор проектын ебәрә.
8. түбәндәгеләр күҙ уңында тотола:
субсидия биреү маҡсаты;
бирелгән субсидия күләме;
ойошма тарафынан финанс йылында файҙа­ла­нылмаған субсидия ҡалдығын кире ҡайтарыу тәртибе;
субсидияны биргәндә тейешле шарттар боҙолған осраҡта уны тейешле бюджетҡа кире ҡайтарыу тәртибе;
ойошма тарафынан субсидия биреү шарттарын, маҡсаттарын һәм тәртибен үтәүҙе Дәүләт комитетының һәм дәүләт финанс контроле органдарының тикше­реүенә ошо ойошманың ризалығы;
ошо Тәртипкә теркәлгән ҡушымтаға ярашлы, ойош­ма тарафынан инвалидтар һәм халыҡтың башҡа аҙ хәрәкәтсән төркөмдәре өсөн транспорт инфраструк­тураһы объекттарын, улар янындағы биләмәләрҙе яраҡлаштырыуға йүнәлтелгән сығымдар тураһындағы отчетты тапшырыу тәртибе һәм сроктары.
Договорҙар Дәүләт комитеты бойороғо менән раҫ­ланған субсидия биреү договорының типовой фор­ма­һына ярашлы төҙөлә.
9. Ойошма договор төҙөүҙән тайпылған осраҡта Дәүләт комитеты бүтән ойошмаларҙың ризалығы менән ошо Тәртиптең 11-се пунктында күрһәтелгән формула буйынса субсидияны ҡайтанан бүлә. Шул уҡ ваҡытта субсидия уны ҡайтанан бүлеүгә ризалыҡ биргән ойошмалар араһында ғына бүленә. Субсидия күләменең үҙгәреүе төҙөлгән договорға өҫтәмә килешеү рәүе­шендә рәсмиләштерелә.
10. Ойошмаға субсидия биреүҙән баш тартыу нигеҙҙәре түбәндәгеләр булыуы ихтимал:
субсидия алыу өсөн ғариза биреүсе исеменән ғәмәл ҡылырға вәкәләте булмаған кеше тарафынан ғариза биреү;
документтарҙы тейешенсә тултырмау (бөтөн графалар һәм юлдар тултырылмаған, документ формаһында ҡаралған бөтә реквизиттар ҙа күрһәтелмәгән, техник хаталар ебәрелгән, төҙәтеүҙәргә юл ҡуйылған, ҡултам­ғалар һәм мисәттең оттискыһы юҡ, документтарҙың күсермәһе раҫланмаған, документтарға ошондай вәкәләте булмаған кеше ҡул ҡуйған);
ойошманың ошо Тәртиптең 2-се пункты менән ҡаралған талаптарға яуап бирмәүе;
ойошма тарафынан ошо Тәртиптең 6-сы пунктында ҡаралған документтарҙы тапшырмау;
тапшырылған документтарҙа хаталы мәғлүмәт­тәр­ҙең асыҡланыуы;
ойошма тарафынан Башҡортостан Республикаһы ҡаҙнаһынан һәм федераль бюджеттан элегерәк би­релгән аҡсаны маҡсатҡа яраҡһыҙ файҙаланыу, Баш­ҡортостан Республикаһы ҡаҙнаһынан һәм федераль бюджеттан субсидия биргәндә шарттарҙы боҙоу осраҡтарының асыҡланыуы.
11. Субсидия ойошмалар араһында түбәндәге формула буйынса күҙалланған субсидия күләменә пропорциональ бүленә:
Ci = С х Hi/H,
унда:
Ci – ойошмаға бирелгән субсидия күләме;
C – ойошмаларға субсидия биреүгә ҡаралған бюджет ассигнованиеларының дөйөм күләме;
Hi – ойошма тарафынан белдерелгән субсидия күләме (ойошманың ғаризаһына ярашлы билдәләнә);
H – барлыҡ ойошмалар тарафынан белдерелгән дөйөм субсидия күләме.
12. Документтарҙы ҡарау йомғаҡтары буйынса ошо йылдың 5 ноябренә тиклем Дәүләт комитеты субсидия күләмдәрен күрһәтеп, уны алыусылар исемлеген раҫлай.
13. Субсидия ойошмаларға договор төҙөлгән көндән 15 көндән дә һуңға ҡалмайынса күсерелә.
14. Субсидия күсереү өсөн Дәүләт комитеты бил­дәләнгән тәртиптә Федераль ҡаҙналыҡтың Баш­ҡорт­остан Республикаһы идаралығына һәм Башҡортостан Рес­публикаһының Финанс министрлығына тейешле форма буйынса касса сығымына ғариза бирә.
15. Башҡортостан Республикаһы бюджеты һәм федераль бюджет аҡсаһы иҫәбенә бирелгән субсидия айырым маҡсатлы булып тора һәм ойошма тарафынан бүтән маҡсаттарға файҙаланыла алмай.
16. Субсидияны биргәндә билдәләнгән шарттар боҙолған осраҡта улар түбәндәге тәртиптә кире ҡайтарыла:
Дәүләт комитеты бүленгән бюджет аҡсаһын кире ҡайтарыу зарурлығы тураһында ҡарар ҡабул иткәндән алып ете эш көнө эсендә ойошмаға тейешле яҙма белдереү ҡағыҙы ебәрелә;
ойошма яҙма белдереүҙе алғандан 30 календарь көн эсендә тейешле аҡсаны Дәүләт комитетының шәхси иҫәбенә күсерергә тейеш;
ойошма тейешле аҡсаны күсереүҙән баш тартҡан осраҡта ул суд тәртибендә түләтелә.
17. Финанс йылында алынған субсидияның фай­ҙаланылмаған ҡалдығы барлыҡҡа килгән осраҡта ойошма ете эш көнө эсендә был турала Дәүләт комитетына яҙма белдереү ебәрергә тейеш.
Дәүләт комитеты ойошманан субсидияның файҙа­ланылмаған ҡалдығы булыу хаҡында яҙма белдереү алғандан һуң өс эш көнө эсендә файҙаланылмаған аҡсаны кире ҡайтарыу зарурлығы тураһында ҡарар ҡабул итә һәм өс эш көнө эсендә ойошмаға субси­дияның файҙаланылмаған ҡалдығын ҡайтарыу кәрәк­леге хаҡында яҙма белдереү ебәрә.
Договорҙа ҡаралған осраҡтарҙа субсидияның фай­ҙаланылмаған ҡалдығы Дәүләт комитетының субси­дия­ның файҙаланылмаған ҡалдығын кире ҡайтарыу за­рурлығы хаҡындағы яҙма белдереүен алғандан 14 ка­лендарь көн эсендә ошо Дәүләт комитетының шәхси иҫәбенә күсерелергә тейеш.
Ойошма күрһәтелгән аҡсаны үҙ ирке менән кире ҡайтарыуҙан баш тартҡан осраҡта ул билдәләнгән ваҡыт эсендә суд тәртибендә түләтелә.
18. Субсидияның дөрөҫ иҫәпләнелеүенә һәм түлә­нелеүенә, бюджет аҡсаһының маҡсатҡа ярашлы файҙаланылыуына контролде Дәүләт комитеты тор­мошҡа ашыра.
19. Дәүләт комитеты һәм дәүләт финанс контроле органы ойошмалар тарафынан субсидия биреү шарттарын, маҡсаттарын һәм тәртибен үтәүҙе мотлаҡ тикшерә.
Дәүләт комитеты комиссия төҙөү юлы менән аҡ­саның маҡсатҡа ярашлы файҙаланылыуына контролде тормошҡа ашыра. Комиссия составы Дәүләт комитеты ҡарары менән раҫлана.