Баҫыу эштәре, ашлыҡ үҫтереү, аҙыҡ-түлек эшкәртеү, етештереү өсөн ниндәй генә техника, ҡорамалдар ҡуйылмағайны бында! Хатта ер кешеһе өсөн ҡулайлаштырып эшләнгән кескәй самолет та “килеп төшкән”. Был аңлашыла: иҡтисадтың барлыҡ тармағындағы кеүек үк ауыл хужалығында ла һөҙөмтәле эшләүҙе заманса техника, транспорттан башҡа күҙ алдына килтереп булмай.

Күргәҙмәне Башҡортостан Хөкүмәте Премьер-министры урынбаҫары Илдар Тимерғәлин асып, рес­публиканың Рәсәй төбәктәре араһында ауыл ху­жалығы тауарҙарын етештереү буйынса алдын­ғылар рәтендә булыуын белдерҙе.
– Бөгөн импортты үҙебеҙҙең аҙыҡ-түлеккә алмаштырыу хаҡында һүҙ алып барғанда, инвесторҙар йәлеп итеү, бәйләнештәрҙе үҫтереү өсөн был сараның уңайлы мөхит тыуҙырырына ышанам, – тине ул.
Республикала эшләнгән ауыл хужалығы техни­ка­һына, ҡорамалдарға ҙур урын бүленгән. “Агрофер­ма” бүлегендә малсылыҡ, ҡошсолоҡ йүнәлешендә шөғөлләнгәндәр үҙҙәренең тәжрибәһе менән уртаҡ­лаша. Ейәнсура районындағы Күгәрсен ауылынан “Маяҡ” ауыл хужалығы предприятиеһының эре һарыҡтары күптәрҙә ҡыҙыҡһыныу уятты.
– 2012 йылда волгоград тоҡомло һарыҡтар һатып алдыҡ, – тине үҙҙәренең эшмәкәрлеге хаҡында хужалыҡ етәксеһе Дәмин Юланов. – Инә һарыҡ­тар 55 – 60 килограмм тарта. Әле уларҙы 3 мең 718 башҡа еткерҙек. Көҙөн Ҡорбан байрамында алты айлыҡ 500 баш тәкәне өсәр меңдән һаттыҡ.
Күргәҙмәлә үҙебеҙҙә етештерелгән аҙыҡ-түлектең күпләп урын алыуы ҡыуаныслы күренеш ине. Мә­сәғүт һөт-консерва комбинаты килтергән ризыҡ­тар­ҙы халыҡ маҡтай-маҡтай һатып алды, “Урал-Тау” ауыл хужалығы предприятиеһының ит аҙыҡтарын да ауыҙ иттеләр.
“Урал-Тау” – республиканың төньяҡ-көнсығыш төбәгендә иң ҙур предприятиеларҙың береһе. Игенселек, малсылыҡ тармағы менән көн иткән хужа­лыҡтың ит эшкәртеү комбинаты, икмәкханаһы бар.
Уңғандар өсөн тәбиғәт миҙгелдәргә бүленмәй, күрәһең. Бүздәктән Фәүил Хәбибрахмановтың әле генә өҙөп алынған ҡыярын тәмләп ҡарағас, күптәр шулай уйлағандыр. Өс гектарҙан көн һайын 15 тон­на витаминлы йәшелсә йыйып алалар икән.
Һәр эш фәнгә бәйләп алып барылғанда ғына үҙ уңыштарын бирә. Күргәҙмәлә фермерҙарға, эш­ҡыуарҙарға малсылыҡ, тоҡомсолоҡ, дәүләт ярҙа­мы, импортты алмаштырыу шарттарында үҙебеҙҙең аҙыҡты етештереү буйынса белгестәр фәһемле кәңәштәр бирҙе.
Сара 20 мартҡа ҡәҙәр дауам итә.