“Булыр бала – биләүҙән” тигәндәре дөрөҫ. Беҙҙең гимназияға ете саҡрым йыраҡлыҡтағы Ҡайынлыҡ ауылы балалары бәләкәйҙән йөрөп уҡыны. Дәрес бөтөү менән кескәйҙәр автобусҡа ашыға йә йәйәүләп ҡайтырға сыға. Ҡайҙа инде ул түңәрәктә шөғөл­ләнеү, өҫтәмә дәрес алыу, төрлө сарала ҡатнашыу?!
Шулар араһынан бер ҡыҙсыҡ ҡына өйөнә түгел, ҡабаланып район мәҙәниәт йортона, пионерҙар һарайына, китапха­наға юллана. Ул – Элена Ғилмуллина. 16 йәшлек сағында райондың иң оҫта һыбайлыһы, шәп бейеүсеһе булараҡ Салауат йыйынында ҡатнашты, сәнғәт мәктәбенең театр, флейта бүлектә­рендә шөғөлләнде.
Хисле, маҡсатҡа ынтылыусан, әҙә­биәткә ғашик ҡыҙҙың Башҡорт дәүләт университетының филология һәм журналистика факультетын һайлауы ла тәбиғи. Уның уңыштарында, һис шикһеҙ, ата-әсәһенең дә өлөшө ҙур. Элена ғилем эстәүҙән бер ҙә генә туҡталмай, белем алыуҙы Көнсығыш иҡтисади-юридик гуманитар акаде­мияһының хоҡуҡ факультетында дауам итә. Үҙен төрлө сифатта, өлкәлә һынап ҡарай, әлегә уның хыялы – берәй сит телде юғары кимәлдә үҙләштереү.
Ғаиләлә ике малай араһында үҫкән­гәлер, геройыбыҙ бер нәмә алдында ла ҡурҡып, ҡаушап ҡалмай, алдынғы маҡсаттар менән йәшәй. Бөгөн Элена район мәҙәниәт йортоноң “Сағыл” халыҡ театрында уйнай, Г. Зәйнә­ше­ваның “Ғәйфи ағай, өйлән давай!” спек­таклендәге Маги ролен оҫта башҡара. Рухи камиллыҡҡа ынтылған ҡыҙҙың театр яратыуы, сәхнәлә йөҙөп уйнауы һоҡландыра ғына.
Заман ағымы машина йөрөткән ҡа­тын-ҡыҙ һанын арттырыуҙы талап иткәндә, Элена ла рулгә ултырҙы, “тимер ат”ын тыныс, ышаныслы “йүгәнләй”.
– Зарурлыҡ бар нәмәгә өйрәтә. Ҡыҙым Аделинаны балалар баҡсаһына, бассейнға йөрөтәм. Үҙ хәбәрсе булараҡ, төрлө тарафҡа осрашыуҙарға, саралар­ға барырға тура килә. Машина һәр эштә лә кәрәк, тик сығымдары ғына артып аптырата, – ти ул. – Ремонтҡа, техник йәһәттән хеҙмәтләндереүгә, яғыулыҡҡа байтаҡ аҡса китә, шулай ҙа уңай­лыҡтары күберәк. Иң ҡыйыны – беренсе аҙым, артабан ҡурҡыуыңды еңә алһаң, машина йөрөтөү кинәнес кенә. Тәүге оҙон юлым Әбйәлил районына булды. Бейек-бейек тауҙарға, тәбиғәткә һоҡ­ланып барып еткәнемде һиҙмәй ҙә ҡалғанмын. Үҙ батырлығыма ышанмай ҙа торҙом. Хәҙер инде машинам ышаныслы дуҫҡа, яҡын юлдашыма әйләнде, уны яратып “аҡсарлағым” тип кенә йөрөтәм.
Үҙ-үҙеңде еңеү, тормош тәжрибәһе туплау – оло ҡаҙаныш. Эленаға яңы үрҙәр, изге юлдар теләп ҡалабыҙ!