Өфөлә уҙғарылған “Өфө-Ладья. Арт. Һөнәр. Сувенирҙар” тигән күргәҙмәлә тап иттек был уңған башҡорт ҡыҙҙарын. Уларҙың тылсымлы ҡулдары тәү ҡарауға ябай ғына күренгән нәмәнән дә мөғжизә тыуҙыра алғанына һоҡланмаған кеше ҡалмағандыр. Берәүҙәр сабыйҙарына, туғандарына гүзәлдәребеҙ йөрәк йылыһын ҡушып эшләгән әйберҙәрҙе бүләккә алып ҡалырға тырышһа, икенселәр, беҙҙе лә өйрәтегеҙ әле, тип серҙәре менән уртаҡлашыуҙы үтенде.


Мәсетле районының Оло Ыҡтамаҡ ауылынан Айгөл Мөхәммәтова ҡайын туҙынан нимәләр генә эшләп килтер­мәгән: ҡурсаҡтар, төрлө һауыттар, паннолар.
– Үҙ һөнәремә сәнғәт мәктәбендә балаларҙы ла өйрәтәм. Ҡыҙҙар, ма­лайҙар был кәсепте ихлас үҙләштерә. Төрлө күргәҙмәләрҙә йыш ҡатнашабыҙ, призлы урындар яулайбыҙ, – тине ул.
Мәләүез районының Нөгөш ҡасаба­һынан килгән Нәйлә Моталлапованың өҫтәле янына ла халыҡ күп йыйылғайны. Алтын ҡуллы ханым, гүйә, үҙе менән йәйге урман хозурлығын алып килгәйне. Ауыҙына һыбыҙғыһын ҡуйып, берсә һандуғас кеүек моңланды, берсә кәкүк булып, “ғүмер һананы”. Бынан тыш, өҫтәлдәге бихисап тәтәйҙәрҙе үҙ ҡулдары менән балсыҡтан эшләгән икән ул.
– Ауыл эргәһендә балсыҡ бар. Шуны барып алам да әүәләп ошоларҙы яһайым, – тине ул. – Унан әҙер әйбер­ҙәрҙе эҫе мейестә ҡыҙҙырам, сағыу төҫтәргә буяйым.
– Алалармы һуң?
– Әлбиттә!
Сибай ҡалаһы ағинәйҙәренең, Әбйә­лил районының Буранғол ауылынан килгән апайҙарҙың ҡулдары ла алтын икән. Улар милли кейемдәре, һуҡҡан балаҫтары менән һоҡландырҙы. Зөлфирә Махийә­нова хатта шәлде лә махсус станокта бәйләй икән.
Ҡырмыҫҡалы районының Са­хай ауылынан Нәзирә Ғәләүет­динованың үҙ ҡулдары менән нағышлап эшләгән ҡур­саҡтарын, гөлләмәләрен күргәндәр ҙә “ах” итте.