Бушлай өлгөрөп ҡалығыҙ


Фатирҙы бушлай хосусилаштырыу 2016 йылдың 1 мартына тиклем оҙайтылды, тип ишеткәйнем. Был дөрөҫмө?

Лилиә.

Көйөргәҙе районы.

Муниципаль милектәге торлаҡты бушлай хосусилаштырыу эше егерме йылдан ашыу барһа ла, илдәге күсемһеҙ милектең 30 проценты әле һаман шәхси ҡулдарға бирелмәгән. Яңы Законға ярашлы, был процедура 2016 йылдың 1 мартына тиклем оҙайтылды.
Бынан тыш, “дача амнистияһы” ла тағы өс йыл барасаҡ. Єйткәндәй, әлегә Рәсәйҙә йәшәгән 10 миллион кеше генә баҡса участкаһын рәсми теркәткән.



Бергәме, айырыммы?


Ер участкаһын һәм ундағы өйҙө һатырға теләйем. Бының өсөн бер договор етәме?

Д. ДИЛМӨХӘМӘТОВ.

Иглин районы.

Хужаһы берәү генә булған йорт йәки башҡа берәй бина ер участкаһы менән ҡуша һатыла. Был хаҡта Рәсәй Ер ко­дек­сының 35-се статьяһындағы 4-се пункт­та әйтелә. Шуға, ғәҙәттә, өй һәм ер участкаһы һатыу-һатып алыу догово­рында бергә күрһәтелә. Уны нота­риуста ла теркәтергә мөмкин, әммә был мотлаҡ түгел. Бер нәмә хаҡында – рәсмиләштергәс кенә һатып алыу­сы­ның йорт хужаһы буласағы ту­ра­һында – оноторға ярамай. Шуға дого­вор төҙөлгәс, Федераль дәүләт тер­кәүе, кадастр һәм картография хеҙмәтенә ми­лек хоҡуғын иҫәпкә ҡуйыу өсөн мө­рә­жәғәт итергә кәрәк. Был иһә – мотлаҡ процедура.
Рәсмиләштереү буйынса һорау­ҙары­ғыҙ булһа, 8-800-100-34-34 бер­ҙәм белешмә телефоны буйынса бушлай шылтыратырға мөмкин.

Рубриканы Айһылыу НИЗАМОВА алып бара.