Бүре урман-ҡырҙарҙы сирле йәнлектәрҙән “таҙалауы”, йоғошло ауырыуҙарға юл ҡуймауы менән тәбиғәткә ҙур файҙа килтерә. Ләкин был йыртҡыс күбәйеп китһә, ауыл хужалығы өсөн хәүеф янай башлай. Һуңғы йылдарҙа төбәктә “урман санитарҙары”ның артыуы күҙәтелә.
Былтыр август – октябрь айҙа­рында район биләмәһендә бүре­ләрҙең 85 баш һарыҡты тамаҡлап китеүе рәсми тер­кәл­гән. Уларҙан бер нисә ауыл пред­прия­тиеһы, шәхси хужалыҡ зыян күргән.
Һөҙөмтәлә район етәк­селеге Һу­нар­сылар һәм балыҡсылар йәмғиә­тенә бүреләрҙе аулау бурысын ҡуйған. Рес­пуб­ликаның Тә­би­ғәт­тән файҙала­ныу һәм экология ми­нистр­лы­ғы­нан рөх­сәт алын­ған, тейешле документтар юллан­ған.
Яҡтыкүл ауылынан егерь Та­һир Ҡа­ранаев – байтаҡ бүре ау­лаған кеше. Уның атаһы Булат Ҡара­наевтың да һунарсы тигән даны тирә-яҡҡа таралған.
– 2013 йылда өс баш бүре ал­ғайным, былтыр атырға тура кил­мәне. Быйыл бер ай эсендә һигеҙҙе эләк­терҙем, шу­ларҙың дүртәүһе – инә, – ти Таһир Ҡа­рана­ев. – Бү­ре бик талым­һыҙ, хәйләкәр, ары­май тиҫ­тә­ләрсә саҡрым юл үтә. Ауға, ғә­ҙәт­тә, таң­ғы сә­ғәт дүрт­тәрҙә сығам, сөн­ки көндөҙ йырт­ҡыс күҙгә бигүк салынып бармай, шыр­лыҡ­ҡа боҫа. Һуңғы­ларын Яңы Ҡа­уар­ҙы, Уҫман ауылдары янын­да атып алдым.
Бынан тыш, батыр йөрәкле егерь кейек-йәнлектәрҙе һаҡ­лау сараһын күрә, ҡабан, мы­шы­ларға тоҙ, фураж һала, ҡыр кәзәләренә бесән әҙер­ләй, “урман хал­ҡы”­ның иҫә­бен алып ба­ра. Әллә ни күҙгә салынмаһа ла, егерь эшмә­кәр­ле­ге ҡыҙыҡлы ла, ҡы­йыулыҡ та та­лап итә.