– Ҙурайғас, уҡытыусы булам!
– Ауыр эштер ул, ҡурҡмай­һың­мы?
– Ә мин уны кинәнесле шөғөлгә әйләндерермен: балаларҙы яратырмын, иғтибарлы, яғымлы булырмын – һәр көнөм байрамдай үтер...

Ике баланың ошолай ихлас һөйләшеүенән башланды күркәм сара. Шик юҡ: яныбыҙҙа яратҡан хеҙмәтен ҙур яуаплылыҡ менән башҡарған, унан йәм табып, сәм алып, һәр көнөн кинәнес тойоп үткәргән уҡытыусылар барҙа, изге хыял тормошҡа ашмай ҡалмаҫ.

Педагогтарҙың һөнәри оҫта­лыҡ­ҡа ярышы ла йылдан-йыл күркәмерәк, эшлеклерәк төҫ ала бара. “Баш ҡаланың йыл уҡы­тыусыһы” конкурсында был айырыуса асыҡ сағыла. Быйылғы бәйге лә таланттарға, ижади асыштарға бай булды.
– Конкурста 55 педагог көс һынашты, – тине ярышты йом­ғаҡлау тантанаһында Өфө ҡалаһы хакимиәте башлығы урын­баҫары Сынтимер Баязитов. – 19 йыллыҡ тарихында һөнәри бәйге меңдәрсә талантлы, һәләтле уҡы­тыусы­ны асты. Ярыштың мәғариф тармағындағы өҫтөнлөклө йү­нәлеш­тәрҙе үҫтереүҙә өлөшө баһалап бөткөһөҙ. Быйылғы кон­курстың үҙенсәлектәре лә бар: әйтәйек, уҡытыусылар һәм ата-әсә берлектә “түңәрәк өҫтәл” ойоштороп, унда мәктәп менән ғаилә араһындағы бәйләнеште нығытыу юлдарын эҙләне, шулай уҡ бәй­геселәр Әҙәбиәт йылы уңайынан яратҡан шиғырҙарын һөйләне.
Тантана йыр-бейеү, сығыштар менән аралаштырылып алып барылды. Төрлө номинацияларҙа еңгән уҡытыусыларҙы тәбриклә­гәндән һуң еңеүселәрҙе билдәләү мәле етте.
Тулҡынланып көткән ваҡиғаның һөҙөмтәһе шундай: М. Кәрим исе­мендәге 158-се башҡорт гим­назия­һынан Айгөл Игелекова баш ҡаланың иң яҡшы башҡорт теле һәм әҙәбиәте уҡытыусыһы булып танылһа, 21-се лицейҙан Айҙар Әхмәтйәнов – урыҫ теле һәм әҙәбиәте, 24-се мәктәптән Зәбирә Раянова татар теле һәм әҙәбиәте уҡытыусылары араһында алдын­ғылыҡты бирмәне.
Ә “Баш ҡаланың йыл уҡытыусыһы-2015” исеменә 58-се лицейҙан Римма Ронжина лайыҡ булды – еңеүсегә автомобиль асҡысы тапшырылды.