Республика Башлығы Рөстәм Хәмитов эш сәфәре менән Октябрьский ҡалаһында булды. Төбәк етәксеһе сәнәғәт һәм социаль объекттарҙы ҡараны, Рәсәй Эске эштәр министрлығының Башҡортостан буйынса бүлексәһенә ҡараған урындағы ойошманың административ бинаһын асыу тантанаһында ҡатнашты.

Оҙаҡламай ҡалала 2-се дауаханалағы перинаталь үҙәктең акушерлыҡ корпусы сафҡа инә. Бала табыу йортоноң төҙөлөп бөтөрөнә күптәр ышанып тә етмәй, сөнки эш 1991 йыл­да уҡ башланған булған. Әммә быуат аҙа­ғын­да финанслау туҡтатылыу сәбәпле, проект ябылған. Төҙөлөш өс йыл элек Рөстәм Хәми­товтың ярҙамы менән тергеҙелгән. Эште атҡарып сығыуға 700 миллион һумға яҡын аҡса сарыф ителгән. Табиптар заманса ҡо­рамалдарға, етлекмәй тыуған сабыйҙарҙы ҡарау бүлексәһе асылыуға ҡыуанып бөтә алмай. Әммә һөҙөмтә республика Башлығын ҡәнәғәтләндермәне.
– Төҙөлөштөң сифатын “өслө” билдәһенә баһалар инем, – тине Рөстәм Хәмитов. – Тө­ҙөүселәр беҙҙе үҙҙәре үк илтифатһыҙлыҡҡа, илке-һалҡылыҡҡа өйрәтә түгелме? Ҡарай башлаһаң, бында – бушлыҡ, тегендә – ярыҡ. Был ниндәй эш алымы һуң? Белгестәр әҙерләүгә аҡса йәлләйбеҙ, эшселәрҙе урам буйынан алабыҙ – һөҙөмтәһен күреп тора­һығыҙ. Әлбиттә, бөтөн нәмә яңы, матур, ә ысынбарлыҡта – тулы етешһеҙлек.
Төҙөлөшкә ҡағылышлы кәмселектәргә республика етәксеһе эске эштәр бүлегенең административ бинаһын асыу тантанаһында ла иғтибар итте һәм киләсәктә подрядсы ойош­ма­ларға талаптарҙы арттырырға ҡушты. Әйт­кәндәй, элек ҡаланың эске эштәр бүлеге, юл хәрәкәте хәүефһеҙлеге идаралығы, кинологтар хеҙмәте төрлө ерҙә урынлашҡан булған. Хәҙер улар бер ҡыйыҡ аҫтында, бар уңайлыҡ­тары булған кабинеттарҙа эшләйәсәк. Объект өсөн буш торған иҫке мәктәп бинаһы бирел­гән, ремонтлауға республика бюджетынан 125 миллион һум аҡса тотонолған. Яңы урын­да граждандарҙы ҡабул итеү, террорға ҡар­шы саралар һәм элемтә буйынса бөтә талаптар иҫәпкә алынған.
Бинаны асыу тантанаһында Башҡортостан буйынса эске эштәр министры Михаил Зако­мал­дин сәләмләү һүҙе менән сығыш яһап, бү­лек етәксеһе, полиция подполковнигы Илья Фи­лип­повҡа ВАЗ-21310 һәм ГАЗ-2715 авто­мо­бил­дәренең асҡыстарын тапшырҙы. Авто­транспорт полицияның участка вәкил­дәре хеҙ­мәтенә һәм кинологтар бүлегенә тапшы­рыласаҡ.