Телевизорға баҡһаң да, радиоға ҡолаҡ һалһаң да, гәзит-журнал асһаң да бер үк хәбәр – хәлдәр бер ҙә яҡшырырға оҡшамаған һымаҡ. Донъяның ниндәй мөйөшөн генә алма – низағ, һуғыш-талаш. Шул ваҡытта бөтөн көскә: “Ишеттерегеҙ яҡшы хәбәр!” — тип ҡысҡырғы килә. Ҡасан тынысланыр был донъя?..

Бынан бер йыл элек кенә Украинала барған хәлдәрҙең барыһы ла ҡыҙыҡ­һын­дырҙы, уйландырҙы. Ә хәҙер? Мә­ҫәлән, Интернетты асһаң, “Украина…” һүҙенән башланған яҙыуҙарға иғтибар ҙа итке килмәй – бер үк күренеш ҡа­батланған һымаҡ. Юҡ, унда йәшәгән халыҡтың яҙмышына битарафбыҙ ти­гәнде аңлатмай был. Киреһенсә, кем­дәр­ҙеңдер бысраҡ уйыны арҡаһында килеп сыҡҡан мәғәнәһеҙ үлемдәр йөрәкте ныҡ әрнетә. Тик, бер үк балыҡ башы тигәндәй, һуғыштың әллә осо-ҡырыйы юҡмы? Ошо бер бәләкәй генә ил эсендә барған ваҡиғалар буйынса донъяның төрлө төбәгендә йыйылып, әллә нисәмә сәғәт буйы фекер алышалар, кәңәшләшәләр, хатта килешкән һымаҡ та булалар бит. Ә икенсе көнөнә – тағы атыш, шартлау. Һәр кем үҙен хаҡлы һанағас, сәғәттәр буйы һөйлә­шеүҙән ни фәтүә? Ябай халыҡты күпме иҙергә була һуң?..
Рәсәйгә ҡарата ҡабул ителгән сикләүҙәр, ҡурҡытыу-янау ҙа һағайтмай ҡалмай, әлбиттә. Ә иҡтисади хәлдең насарайыуы утҡа ҡуҙ ғына өҫтәй. Оҙон һүҙҙең ҡыҫҡаһы, тормошобоҙ тотош бер һынау һымаҡ. Әлбиттә, донъя тирәләй һүҙҙе дауам иткәндә, башҡа илдәр араһында ҡуйырған болаларҙы, милли һәм дини-ара ығы-зығыны, “йүгәнһеҙ хаҡтар”ҙы ла күп өҫтәргә булыр ине, тик маҡсатым башҡа. Донъя тынысланырмы? Шул һорауға яуап табырға ине.
Украиналағы хәлдәргә бәйле сик­ләү­ҙәргә әйләнеп ҡайтҡанда, ил етәкселеге әйтеүенсә, әлеге ауырлыҡ­тар – ваҡыт­лы­са күренеш, уның йыл аҙағына яйға һалыныуы мөмкин. Был инде яҡын һәм йыраҡ күршеләребеҙҙән тора. Әлбиттә, беҙ – сабыр халыҡ, ауырлыҡтарға ла теште ҡыҫып түҙергә әҙер. Яңыраҡ бер чиновник әфәнде әйтмешләй, ҡайышты ла нығыраҡ быуырбыҙ: тик… ишетте­регеҙ яҡшы хәбәр!