Хоҙай унан бер ниҙе лә йәлләмәгән: һомғол буй, матурлыҡ, зирәклек, аҡыл, егәрлелек, ныҡышмалылыҡ... БДУ-ның филология факультетында белем алған был ҡыҙға күптәр сәнғәт юлын һайларға ла тәҡдим итеп ҡарай. Тик ул үҙ һөнәренә тоғро ҡала.

Һүҙем – күптәргә билдәле йәмәғәт эшмә­кәре, алдынғы педагог Әнүзә Йо­мағолова хаҡында. Белорет районы­ның Манышты ауылы ҡыҙы ҡырҡ йыл­дан ашыу ғүмерен уҡытыусылыҡ эшенә бағышланы, йәш бы­уынға баш­ҡорт теле һәм әҙәбиәтенән белем бирҙе. Вазифаһын мөкиббән яратып баш­ҡар­ҙы ул. Шунлыҡтан да балалар­ҙың, ата-әсә­ләрҙең, мәктәп коллективының ҙур хөр­мә­тенә лайыҡ булды. Бер хаттан өҙөк килтерәм: “Мөләйем йөҙлө сибәр ҡатындың яғымлы тауышын ишет­кәс тә, уның беҙҙе алмаштыра алы­рына ышандыҡ. Өмөтөбөҙ аҡлан­ды. Беҙ, Республика иҡтисад лицей-интернатында уҡыған ҡыҙҙарҙың әсә-ата­һы, Әнүзә Ишдәүләт ҡыҙынан бик ҡәнә­ғәтбеҙ. Балаларыбыҙ быйыл IX класты тамамлай. Киләсәктә ҡайҙа ғына барһа­лар ҙа, Әнүзә апайҙарының кәңәштә­рен, хәстәрлеген, ул уҙғарған йөк­мәт­келе кисәләрҙе, театрға, музейҙарға экскур­сияларҙы онотмаҫ. Уҡы­тыу­сы һәр ба­ланың күңеленә юл, барыһына ла яҡшы һүҙ таба белә”.
Әнүзә Йомағолова тураһында “Баш­ҡорт­остан” гәзитендә билдәле педагог, яҙыусы Мәр­йәм Бураҡаева ифрат фә­һемле итеп яҙғайны. Мәҡәләне ғорур­ла­нып уҡыным. Замандашымдың күр­кәм сифаттарына, һәр кемгә ярҙам итергә әҙер тороуына хайран ҡалам. Әйтәйек, ике йыл элек мине үҙе йөрөгән “Өфө хә­тирәләре” исемле фольклор ансамбле­нә саҡырғайны. Унда һәр саҡ шатланып барам.
Тормоштоң матурлығын күреп, бар ергә өлгөрөп йәшәргә тырышҡан Әнүзә Ишдәүләт ҡыҙы ижад менән дә шөғөл­лә­нә, моңло итеп йырлай ҙа, һүрәт тә төшөрә. Уңған хужабикә лә ул. Ҡул эштәре, ҡәҙерләп үҫтергән гөлдә­ре күҙ­ҙең яуын алырлыҡ. Йәмәғәт эштәрендә әүҙем ҡатнашҡан, халҡының, теленең киләсәге өсөн янып йәшәгән Әнүзә Ишдәүләт ҡыҙынан өлгө алырға ғына ҡала.