Йәйғор төҫөндәге сариҙар, күңелдәргә үтеп ингән йыр-бейеү, мөхәббәт менән тулы кинолар, барыһы маҡтай-маҡтай эскән хуш еҫле сәй... Ана шулай ҡабул итә торғайны беҙҙең ил халҡы алыҫ Һиндостанды. Баҡтиһәң, был илдә үҙенә ылыҡтырырлыҡ серҙәр бихисап икән.

Республика башлығы Рөстәм Хәмитов Һиндостандың Рәсәйҙәге Ғәҙәттән тыш һәм тулы хоҡуҡлы илсеһе Пунди Шринивасан Рагхаван менән осрашыуҙа киләсәктә хеҙмәт­тәш­лекте нығытыу хаҡында һөйләште.
– Һиндостан менән Башҡортостан араһын­да сауҙа күләме үҫә. Былтыр ул 400 миллион доллар тәшкил итте. Был 2013 йылға ҡара­ғанда ике тапҡырға күберәк. Уны йәнә ике мәр­тәбәгә арттырғанда тағы ла яҡшыраҡ бу­лыр ине. Әлегә беҙҙең аралағы бәйләнеш ул тиклем ныҡ үҫешмәгән, – тине республика Баш­лығы. – Беҙгә һеҙҙән инвесторҙар йәлеп итеү отошло булыр ине. Дарыу етештереү өлкәһендә хеҙмәттәшлекте үҫтереү зарур. Һин­достан – мамыҡ, туҡыма, йөн, тире етеш­тереү һәм һатыу буйынса донъяла танылған ил. Ә Башҡортостанда урман сәнәғәте комплексы үҫешкән. Шулай уҡ ауыл хужалығы өл­кәһендә лә файҙалы проекттар бар.
Рөс­тәм Хәмитов менән Пунди Шринивасан Рагхаван артабан ике аралағы бәйләнеште ны­ғы­тыу йүнәлештәрен билдәләне. Баш­ҡорт­остандың юғары уҡыу йорттарын­да Һиндос­тандан 65 студент белем ала. Илсе ки­лә­сәктә был өлкәлә лә дуҫлыҡты нығытыу кәрәклеген әйтте.