Бөйөк Еңеүҙең 70 йыллығы уңайынан Башҡорт­ос­танда “Быуындар йөрә­гендә — хәтер һәм ғорурлыҡ” федераль проекты сиктәрендә йәштәрҙең патриотик слеты уҙасаҡ. Шулай уҡ республи­каның барлыҡ белем биреү учреждениеларында Ҡаһарманлыҡ дәрестәрен үткәреү, киләсәк быуынға патриотик тәрбиә биреү, ветерандарҙы һәм тыл хеҙмәтсәндәрен социаль яҡлау тураһындағы ҡануниәтте камиллаштырыу буйынса “түңәрәк өҫтәл”дәр ойоштороу күҙаллана.

– “Башҡортостандың патриотик карта­һы”, “Геройҙар һәм ваҡиғалар”, “Беҙ – ҙур команданың өлөшө”, “Еңеү исемдәре” йүнә­лештәрендә эшләйбеҙ, – тип билдә­ләне Дәүләт Йыйылышы — Ҡоролтайҙың Мәғариф, мәҙәниәт, спорт һәм йәштәр сәйәсәте буйынса комитеты рәйесе Эльвира Айытҡолова байрамға әҙерлек буйынса кәңәшмәлә. – Һәләк булған һәм хә­бәрһеҙ юғалған һалдаттар, уларҙың ҡәберлектәре хаҡында белешмә йыйыу күптән башланды. Бынан тыш, “Хәтер кита­бы”ның сират­тағы томы нәшер ителәсәк.
Кәңәшмәлә Дәүләт Йыйылышы – Ҡорол­тайҙың Һаулыҡ һаҡлау, социаль сәйәсәт һәм ветерандар эше буйынса комитет рәйесе Николай Никитин да сы­ғыш яһаны. Ветерандар, тыл хеҙ­мәт­сәндәре социаль яҡтан яҡлан­ғанмы? Николай Ильич әй­те­үенсә, ошо һәм башҡа мәсьәләләргә ҡа­ғылыш­лы етеш­һеҙлек­тәрҙе асыҡлау маҡса­тында мониторинг үткәре­ләсәк.
– Дәүләт Йыйылышы депутаттары алдында Бөйөк Ватан һуғышында Еңеүҙең 70 йыллығына арналған сараларҙа әүҙем ҡатнашыу бурысы тора, – тип һыҙыҡ өҫтөнә алды Башҡортостан Дәүләт Йыйылышы – Ҡоролтай Рәйесе урынбаҫары Йомабикә Ильясова кәңәшмә һуңында. – Бөйөк Ватан һуғышы ветерандары һәм тыл эшсәндәре менән осрашыуҙар үткәрә­сәк­беҙ, ҡаһарманлыҡ һәм патриотик тәрбиә биреү дәрестәре уҙғарасаҡбыҙ. Бер ветеран да иғтибарһыҙ ҡалырға тейеш түгел.