Башҡорт теле һәм әҙәбиәте уҡытыусыһы, Рәми Ғариповтың кабинет-музейы етәксеһе Альбина Кайбышева белдереүенсә, үҙең ҡанат нығытҡан белем усағында хеҙмәт итеү оло яуаплылыҡ талап итә.

Шулай тура килһенсе – оҙон тәнәфес тамамланып, киләһе дә­рес башланыуға ғына барып индек. 8 “Б” класында баш­ҡорт теле дәресе башлана, бөгөн “Шарт һөйләм” тигән теманы үтәләр икән. Уҡы­тыу­сы алдан уҡ уның бигүк еңел тү­гел­ле­ген иҫ­кәртте. “Яратҡан дәресе баш­лан­дымы – уҡыусы күҙендә нур уйнай”, – тип миҫал килтерҙе ул һәм ошо һөйләмде таҡтаға яҙып ҡуйҙы. Аҙаҡтан инде теманы нығы­тыу өсөн уҡыусыларҙың үҙҙәренән дә һөйләттерҙе.
Үҙем бер генә йыл булһа ла уҡытыусы йөгөн тартып ҡараған кеше булараҡ ҡыҙыҡһынып, Альбина Хәсән ҡыҙынан яратҡан уҡыусыһы бармы-юҡмы икәнле­ген һораштым.
– Ысынлап та, ҡайһы бер уҡы­тыусы­ларҙың һәр класта тиерлек ундай балаһы булыуын ишеткәнем бар, – тине ул. – Әм­мә минең өсөн малай һәм ҡыҙ­ҙарҙың бөтәһе бер иш, уларҙың барыһын да яратам, ғөмүмән, айырып ҡарау яҡлы түгел­мен. Атайым да, әсәйем дә уҡытыусы ине, мәғариф тип янған шундай ғаиләлә үҫкәнгә күрә, бала мәк­тәптә мөмкин тиклем күберәк бе­лем туплаһын, яҡшы тәр­биә ал­һын өсөн бар күңелем менән тырышам.
Дәрес барышында бына ни­ҙәр күҙгә салынды: беренсенән, был класс берҙәм, уҡытыусы ме­нән уҡыусы араһындағы йылы мөнәсәбәттең күптән барлыҡҡа килгәнлеге һиҙелә, икенсенән, балалар фекерҙәрен ҡыйыу һәм төплө итеп аңлата белә, дә­лилдәр килтерә. Альбина Хәсән ҡыҙы киләсәктә улар араһынан лайыҡлы кешеләр, яратҡан ша­ғи­рыбыҙ Рәми Ғарипов ише ижад­сылар ҙа үҫеп сығырына һис кенә лә шикләнмәй.
Элегерәк шағирҙың музейы айырым ка­бинетты биләгән. Уҡы­тыусылар кәңәш­ләш­кәндән һуң, уны кабинет-музей итеп үҙгәртергә кәрәк тигән фекергә килгән, сөнки дәрес үткәреү уңай­лы буласаҡ. Кластың ишеген асып инеүселәр әҙиптең тормошо һәм ижады менән ентекле танышыу мөмкинлегенә эйә.
– Беҙҙән ҡунаҡтар өҙөлмәй, бе­рәүҙәр­ҙе оҙатыуға икенселә­рен ҡаршылайбыҙ, – ти Башҡорт­ос­тандың мәғариф алдын­ғыһы Альбина Кайбышева. – Респуб­ли­­кабыҙҙан ғына түгел, бүтән тө­бәктәрҙән дә киләләр. Йәштәргә лә, Рәми Ғарипов­тың ижадын тә­рәнерәк өйрәнергә теләгән өлкә­нерәктәргә лә бик күп ҡыҙыҡлы, фай­ҙалы мәғлүмәт бирә ала был кабинет-музей. Шағирға ҡағы­лыш­­лы бөтә нәмәне лә күҙ ҡараһы­лай ҡәҙерләп һаҡлайбыҙ, яңыла­рын туплайбыҙ, эҙләнәбеҙ. Әйткән­дәй, республикабыҙҙа “Ғарипов уҡыуҙа­ры” исемле ғилми-ғәмәли конференция уҙғарыла. Яҙыусы­ның ижады менән киңе­рәк та­ныш­тырыуҙы, балала телгә һәм әҙәбиәткә ҡарата һөйөү уятыу­ҙы, йәш бы­уынға рухи-әхлаҡи тәрбиә биреүҙе маҡ­сат иткәнбеҙ.
Дәрес тамамланһа ла, балалар сығып китергә ашыҡмай: кемдер киләһе дәрескә әҙер­лә­нә, икенселәр уҡытыусы апала­ры янына йыйыла. Ә Альбина Хәсән ҡыҙы барыһын да ихлас тыңлай, кәңәштәр әйтә, йүнәлеш бирә. Үҙен ысын уҡытыусы тип тойған кеше генә шундай күркәм сифаттарҙы үҙ итәлер, минеңсә.