Күптән түгел Таллинндың Теллискиви ижади ҡаласығында “Китап миҙгеле. 2014 йылдың көҙө” тигән яңы китаптар менән таныштырыу сараһы ойошторолдо. Унда Андрус Яаксооның “XIX—XX быуаттарҙағы эстон балалар һәм үҫмерҙәр әҙәбиәтенә асҡыс”, Надежда Гаврилованың “Пусиҙың Эстониялағы яңы тормошо”, Флүзә Хәйруллинаның “Эстония онотмай. Салауат Юлаев” китаптары, шулай уҡ “Таллинн” журналының яңы һаны тәҡдим ителде. Сарала Мәҙәниәт министрлығы вәкилдәре, яҙыусылар, мөхәррирҙәр, әҙәбиәт һөйөүселәр ҡатнашгты.
Иң ҡыҙыҡлыһы шул: әҙәби кисә ге­ройҙарының өсәүһе Башҡорт­ос­тан­дан ине. “Таллинн” жур­налының баш мөхәррире Нелли Мельтцтың ата-әсәһе Икенсе донъя һуғышы осоронда Баш­ҡортостанға эва­куа­ция­лан­ған. Нелли Дәүләкән районында тыу­ған һәм 19 йәшкә тиклем шунда йәшәгән. Тағы ла бер китаптың авторы Надежда Гаврилова ла Эстонияға Совет осоронда күсеп килгән. Уның телефонында ла башҡорт көйө уйнай.
“Эстония онотмай. Салауат Юлаев” китабының 20 октябрҙә сыҡҡан икенсе баҫмаһында милли батырыбыҙҙың тормошо, тарихы сағыла. Китап фотолар менән байы­тылған. Салауат Юлаевтың тыуы­уына 260 йыл тулыу айҡанлы Эстонияла һәм Башҡортостанда үткәрелгән сараларҙағы фотолар ҙа бар бында.
Эстонияның Мәҙәниәт ми­нистр­лығы вәкиле Мадис Ярыв тиҙҙән Мостай Кәримдең “Салауат Юлаев” пьесаһы буйынса эстон телендә спектакль ҡуйыу ниәтен белдерҙе. Уның менән Эстон драма театры шөғөл­ләнәсәк.
Әҙәби кисә башҡорт йыр-моңо ме­нән тамамланды. Таллинндағы башҡорт йәмғиәтенең йәш вә­килдәре Илнур Хәйруллин менән Рәсүл Ҡадиров ҡурайҙа һәм ҡумыҙҙа халыҡ көйҙәрен баш­ҡарҙы.
“Эстония онотмай. Салауат Юлаев” китабы һатыуға сы­ғарылды, шулай уҡ Эстониялағы мәктәптәргә, юғары уҡыу йорттарына ҡала китапханаларына ебәрелде.
Флүзә ХӘЙРУЛЛИНА,
“Ағиҙел” башҡорт мәҙәни йәмғиәте рәйесе.