Мәскәү, Новосибирск ҡалаларында ойошторолоп, быйыл Өфөлә үткәрелгән “Блоггерҙар НеФорумы” киң мәғлүмәт саралары вәкилдәре өсөн үтә лә ҡыҙыҡлы һәм яңы күренеш булды.

Теркәү үткәндән һуң, ҡулына “Кущтанащ” тигән яҙыулы пакет тотоп сыҡҡан йәш ханымды күреп, уға мөрәжәғәт итәм:
– Хәйерле иртә, аңлауымса, һеҙ бөгөнгө “НеФорум”да ҡатнашыусы блоггер?
– Эйе, мин Асия Арыҫланова булам, Өфө ҡалаһында үткән туйҙар хаҡындағы “Marry me, Rustеm.ru” блогының авторы. Ҡасандыр “Йәнле журнал” сайтында блог алып бара инем, һуңғараҡ бер дуҫым менән шәхси сайт астыҡ, эште шунда дауам иттек.
– Блогтың атамаһы бик үҙенсәлекле яңғырай, ни өсөн тап егет исемендә туҡталдығыҙ?
– Тәүҙән үк ул Өфө ҡалаһы менән бәйле, ләкин киң ҡул­ла­нылған “Башҡортостан”, “Өфө” һүҙҙәре ҡыҫтырылмаған бу­лырға тейеш тигән маҡсатыбыҙға ярашлы һайланды.
– Аңлашылды, ә “Marry me Rustеm.ru”ла һүҙ башлыса нимә хаҡында бара?
– Блогта баш ҡалала үткән туй тантаналарынан тулы, йә­шерен-батырынһыҙ отчет “йыйыла”. Мәжлесте ҡайһы белгес нисек алып барыуы, теге йәки был хеҙмәтте ниндәй сифатта тәҡдим итеүе, кемгә мөрәжәғәт итергә һәм ошо юҫыҡтағы башҡа бик күп һорауҙарға туйҙары булып үткән һәм буласаҡ йәштәр үҙ-ара фекер алыша, файҙалы кәңәштәр туплай. Блогтағы яҙмаға ҡушып фото, видео ҡалдырыу мөмкинлеге лә бар.
– Тимәк, ниндәйҙер кимәлдә рекламаға ла урын бирелгән?
– Юҡ-юҡ, был реклама түгел, ә туйҙар хаҡында ысын­бар­лыҡҡа тап килгән, “баштан үткән” тәжрибә, фекер менән уртаҡ­лашыу майҙаны. Мәҫәлән, туйҙы биҙәүсе (дизайнер) талап ителгәнгә илке-һалҡы ғына ҡарап, эшен еренә еткереп баш­ҡарманы, әммә аҡсаны тулыһынса алды, ти. Биҙәлеш һөҙөм­тәһенән ҡәнәғәт булмаған, кәйефе ҡырылған йәш ғаилә, беҙҙең блогка инеп, белгес хаҡында үҙ фекерен яҙып ҡалдыра. Был иһә башҡа парҙарға туй үткәргәндә кемгә мөрәжәғәт итеү-итмәү мәсьәләһендә кәңәш тә, ҙур ярҙам да булып торасаҡ. Оҡшаһа – маҡтап яҙалар, оҡшаманы икән – тәнҡиткә лә юл асыҡ.
– Һеҙҙе даими уҡып барыусыларҙың һанын әйтә алаһы­ғыҙмы?
– “Бәйләнештә” социаль селтәрендәге төркөмөбөҙҙә ике мең­дән ашыу кеше теркәлгән, ә дөйөм ҡарауҙар һаны – айына алты мең тирәһе.
– Ҡасан һәм ни өсөн тап был эш менән шөғөлләнергә ҡарар иттегеҙ?
– Ике йыл элек башланым, тик был хобби кеүегерәк, төп һөнәрем дә ошо юҫыҡта. Бөгөнгө “НеФорум”ға күберәк белем, башҡа өлкәләргә лә ҡағылышлы мәғлүмәт алыу маҡсатында килдем. Мине бигерәк тә социаль селтәрҙәр менән эш итеү серҙәре ҡыҙыҡһындыра, секцияның да ошондайын һайланым.
Асия кеүек ижади ҡарашлы, йәмәғәтселек менән тығыҙ бәйләнештә йәшәгән дәртле, һәр ваҡыт шәхси фекеренә, әйтер һүҙенә эйә егет һәм ҡыҙҙар “Аҡбуҙат” ипподромында уҙған дәү­ләт-ара “Блоггерҙар Нефорумы”на Белоруссиянан, Ҡаҙағстан­дан, Әрмәнстандан, Калининград, Владивосток ҡалаларынан да килгән ине. “НеФорум”да ҡатнашыусылар алдында бил­дәле журналист, публицист, иҡтисадсы Анатолий Вассерман фәнгә таянып эш итеүҙең уңышлы икәнлеге хаҡында һөйләне, киң танылған блог авторҙары мультимедиа жур­налистикаһы мөмкинлектәре, интерактив махсус проекттар булдырыу юлдары менән таныштырҙы. Барлығы һигеҙ секцияла фото-, видеоблогинг, социаль селтәрҙәрҙе, блогер һөнәрен яҡтыртҡан тулы йөкмәткеле, ҡыҙыҡлы сығыштар яңғыраны.
Ойоштороусыларҙың береһе, Евразия мәғлүмәт үҙәге вәкиле Татьяна Магера әйтеүенсә, быйылғы “НеФорум” милли һыҙатта үткәрелеүе менән үҙенсәлекле, башҡорт блогосфераһына баш­ланғыс булараҡ та әһәмиәткә эйә.
– Бында йыйылғандар бөтә нәмә менән дә ҡыҙыҡһына һәм бер-береһе менән Интернеттағы никтары аша ғына таныш булһа, бөгөнгө сара уларға йөҙгә-йөҙ күрешеү, асыҡ аралашыу мөмкинлеген тәҡдим итә. Гел генә үҙ ҡаҙаныңда ҡайнамай, башҡа өлкә кешеләре менән дә хеҙмәттәшлек итеү, ғилем уртаҡлашыу кәрәклеген дә яҡшы тойоп килгән “НеФорум” ҡунаҡтары. Бындай осрашыуҙарҙан һуң блогосферала йән­лелек һиҙелә, төбәктең дә рейтингы байтаҡ арта, – тигән аңлатма бирҙе ул.
Тәүге көн оҫталыҡ, мәғлүмәт уртаҡлашыу өсөн тәғәйенләнде. Сараның икенсе көнөндә илдең бихисап төбәктәренән килгән ҡунаҡтар өсөн Өфө буйлап дүрт төрлө йүнәлештәге сәйәхәт ойошторолдо. Сәнғәткә битараф булмағандар “Болоттар” үҙә­генә ыңғайланы, ирек, киңлек һөйгәндәр “Первушино” аэродромына юл тотто. Баш ҡаланың иҫтәлекле урамдары, Мостай Кәримдең һәйкәле, йырсы Земфираның тәүге сығыштары яңғыраған ер аҫты үткәүелдәре, яҙыусы, журналист Сергей Дов­латов йәшәгән өй, “Сармат алтындары” һаҡланған Милли музей, Салауат Юлаев исемендәге паркта ҡала мэры Ирек Ялалов менән осрашыу, Өфөнөң бөгөнгөһө, киләсәге менән танышыу блоггерҙарҙа ҡалаға, Башҡортостан тарихына ҡарата оло ҡыҙыҡһыныу уятты.
Республика халҡының мәғлүмәтле, журналистарҙың тәжри­бәлерәк булыуы өсөн ыңғай аҙым тип ҡабул ителгән “НеФорум” һәр өлкәлә тейешле һәм файҙалы эҙ ҡалдырыр, моғайын.