Оҙайлы байрам көндәре та­мам. Эшкә тотонорға ваҡыт. Хоккейсылар ҙа боҙға сыҡты.

Яңы йыл алдынан иһә юлаевсылар Европала Шпенглер кубогына ярышта ҡатнашты. Финалда еңелеп ҡуйҙылар. Етмәһә, быйылғы тәүге КХЛ матчтарында ла – “Ме­тал­лург”­ҡа, “Барыҫ”ҡа ҡаршы – уңыш­һыҙлыҡҡа осранылар. Уйындарында тағы көрсөкмө?
...Тәбиғәт көйһөҙләнеп тороуға ҡара­маҫтан, “Өфө-Арена” шығырым тулы ине тиерлек. Әлеге ваҡытта Гагарин кубогы хужаһы – Силәбе өлкә­һе хоккейсылары ниндәй һабаҡ бирер беҙ­ҙе­келәргә? Аһ, ни булған был маҡтаулы уйынсыларға? Әллә уларға артыҡ ял ҡамасауланымы, әллә яҡташтарыбыҙ, етте отолорға, тип ғәрләндеме – “Салауат Юлаев” күр­шеләрҙе “туҡмаҡ ашатып” ҡай­тарҙы (3:2). Буран тимәй, боҙ һара­йына килгән көйәрмәндәрҙең күңеле булды.
Хәҙер сиратта – Ҡазан. Матч алдынан яҡташтарыбыҙҙы тәүге тапҡыр чемпион бейеклегенә күтәргән баш тренер Сергей Михалев Рәсәй хок­кейының Дан залына ҡабул ителде. Уға исемле йөҙөк менән свитер тапшырылды. Аре­на данлыҡлы белгесте аяғөҫтө алҡыш­ланы. Тимәк, был көндә еңе­лергә һис ярамай.
Шөкөр, шулай булды ла. Ул реактив тиҙлек, ул сәм, ул ғәйрәт! Күҙ ҡыуана, күңел йырлай. Меңәрләгән көйәрмән бер тауыштан ҡысҡыра. Биллаһи, яратам ошондай мәлде!
5:3 – еңеү! Эш көнөндә арыуым һыпырып алғандай юҡҡа сыға. Ярай әле өйгә ҡайтып китмәгәнмен, тип ҡыуанам...