– Арыумы әле, ҡустым?
– Һәйбәт кенә, Өлгөрбай ағай!
– Хәлдәр нисек?
– Шәп!
– Ҡайҙа китеп барыш?
– Киноға.
– Киноға? Сессия мәлендә ниндәй кино ти ул? Әйткәндәй, уҡыуҙар нисек? Ҡыйын түгел­ме? “Ҡойроҡ”тар юҡмы?
– Ҡайҙан “ҡойроҡ” булһын ти. Гөрләтеп тапшырабыҙ уны. Бына дүрт имтиханды бирҙем, иртәгә йәнә бер зачетты тап­шырабыҙ. Унан – каникул.
– Иртәгә зачет, тиһең, ә үҙең киноға китеп бараһың. Исма­һам, әҙерләнер инең, бирә ал­май ҡуйһаң, ҡыйын булыр ҙа. Эй, хәҙерге йәштәр бигерәк еңел-елпе йәшәй ҙә инде.
– Эй, Өлгөрбай ағай, юҡҡа борсолма! Мин ул фәндән уҡы­маһам да бирәм.
– Нисек улай, әллә белеп тыуҙыңмы?
– Бер нәмә белмәһәм дә тап­шырам.
– Аңлап бөтмәйем…
– Эй, Өлгөрбай ағай, Өлгөр­бай ағай! Үҙеңдең өлгөрмәгән ерең юҡ, ә үҙең шуны ла аңла­майһың! Хәҙер бүтән заман. Аҡса заманы! Кеҫәңдә “мани-мани” ғына булһын, тексәйеп, күҙ бөтөрөп, китап уҡып ултырыу ҙа кәрәкмәй. Бигерәк ан­һат! Хәҙер бөтә ерҙә шулай итәләр. Бер дуҫым да вузда уҡый. Ғәҙеллекте яҡларға өй­рәт­кән профессорҙар үҙҙәре, аҡсаң булмаһа, әйләнеп тә ҡарамай, ти.
…Һай, үҙгәрҙе шул заман, үҙгәрҙе. Элек Урта Азия, Кавказ яҡтарында ғына бындай алама ғәҙәт булыуын ишет­һәк, хәҙер бөтә ерҙе биләп алды. Заман кәсебен Өфө статистика, информатика һәм иҫәп­ләү техникаһы колледжында уҡытҡан Оксана Шклярук та үҙләштереп ала. Ниңә, бик шәп! Эш хаҡы ла бара, өҫтәмә рәүештә аҡса ла тамып тора! Башҡалар шулай эшләгәндә ул суфый кеше кеүек ҡарап тор­һонмо ни! Кемдән кәм! Юғары уҡыу йорттарында уның ҡәҙәре генә алалармы…
Шулай итеп, Шклярук 2013 йылдың декабренән 2014 йыл­дың май айы­на ҡәҙәр бөтәһе 69 мең “эшләгән”, йәм­ғе­һе 28 студент рәхәт кенә зачет алған. Әммә сираттағы һынау уҡы­тыу­сы ханым өсөн һуңғыһы була. Бер студент теүәл 10 мең һум аҡса тотторғанда, хоҡуҡ һаҡлау хеҙ­мәткәрҙәре уны ҡулынан эләк­терә.
Хәҙер улар Оксана Шкля­руктың үҙенән “имтихан” ала, тиҙәр.