Яңы йыл байрамын күп халыҡтар үҙҙәрендә ҡабул ителгән календарь буйынса билдәләй. Ә был йола беҙҙең эраға тиклем III меңйыллыҡта уҡ Месопотамияла барлыҡҡа килгән. Һу­ңы­нан Рим императоры Юлий Це­зарь Яңы йылды ҡаршы алыу да­таһын 1 ғинуарға күсерә. Римдар был айҙы бөтә башланғыстарҙың алла­һы Янусҡа бағышлай. Айҙың исеме шунан килеп сыға.
XV быуатҡа тиклем Рәсәйҙә Яңы йылды Юлиан календары буйынса 1 мартта, баҫыу эштәре башланған ваҡытта, изге Пасха көнөнән бил­дәләгәндәр. 1348 йылғы Мәскәү Соборы йылды 1 сентябрҙән башларға ҡарар сығара. Был ваҡытта халыҡтан яһаҡ, пошлина, оброк йыйыу тамамлана. Пётр Беренсенең махсус Указы менән, Юлиан календары буйынса башҡа Европа илдәрендәге кеүек үк, Яңы йыл Рәсәйҙә 1700 йылдың 1 ғинуарынан башлана.
1699 йылдың 20 декабрендә Петр I «Яңы йылды байрам итеү тураһында» 1736-сы Указға ҡул ҡуйған. Унда былай тиелә:
«… Яңы йылды 1 сентябрҙән тү­гел, ә быйылғы 1700 йылдың 1 ғи­нуа­рынан иҫәпләргә. Ошо яҡшы баш­лан­ғыс уңайы менән байрам ит­кәндә бер-береңде Яңы йыл менән ҡотлар­ға… Данлы һәм күп кеше йөрөй торған урамдарҙың йорттарын, ҡапҡаларын ҡарағай, шыршы һәм артыш ботаҡ­тары менән би­ҙәр­гә. Мылтыҡтарҙан һәм ҙур булмаған пушкаларҙан атырға, мөмкинлеккә ҡарап уттар тоҡандырырға..»