Яңы йыл – бөтәбеҙҙең дә яратҡан байрамы. Шул уҡ ваҡытта күпселек өсөн ул күңел асыу ғына түгел, ҙур ғына көсөргәнеш тә, сөнки барыһын ойошторорға, табын әҙерләргә, тәмлекәстәр бешерергә, бүләктәр һатып алырға, күркәм кейем һайларға кәрәк. Байрамдан һуң өйҙө йыйыштырыу, һауыт-һабаны йыуыу һәм башҡа бик күп мәшәҡәт көтөүен күҙ алдына килтерһәң, бер аҙ күңел ҡырыла. Яңы йыл байрамынан кинәнес алам тиһәң, түбәндәге кәңәштәргә ҡолаҡ һалыу зыян итмәҫ.
Алдан хәстәрләгеҙ

Яңы йылға бүләктәрҙе йыл дауамында һатып алырға мөмкин. Кәйефе­геҙ ҙә күтәрелер, кибеттә сиратта то­рорға ла тура килмәҫ. Байрамды ҡай­ҙа ҡаршылауҙы алдан уҡ хәл итеү ҙә зыян итмәҫ – ҡунаҡҡа бараһығыҙ­мы, әллә уларҙы үҙегеҙ саҡыраһығыҙ­мы? Ҡунаҡтарҙы бер ай алдан уҡ иҫкәртеп ҡуйыу яҡшы булыр.

Күңелегеҙ күтәренке булһын!

Яңы йыл төнөндә нимә эшләйәсәк­һегеҙ – был хаҡта алдан уҡ уйланығыҙ. Бүләктәр бик мөһим, әл­биттә. Шул уҡ ваҡытта төрлө күңелле саралар ойоштороу ҙа байрамға йәм өҫтәр. Тауҙан шыуыу, салют, теат­р­лаштырылған тамашалар, Ҡыш ба­байҙы саҡырыу һ.б. оҙаҡ хәтерҙә ҡалыр.

Иң яҡындарығыҙ килһен

Ҡунаҡты күп саҡырып, шау-шыулы ҙур табын ҡороуҙың кәрәге юҡ. Иң яҡын, яратҡан кешеләрегеҙҙе саҡыр­һа­ғыҙ, байрам бигерәк тә күркәм, кәйе­фегеҙ шәп булыр.

Ҡулдан яһағыҙ

Өйөгөҙҙә тылсымлы оҫтахана асып ебәрегеҙ. Биҙәүес әйберҙәрҙе, сувенир, бүләктәрҙе үҙ ҡулығыҙ менән яһарға тырышығыҙ. Һөҙөмтәлә күңе­ле­геҙ күтәрелер, байрам кәйефе ты­уыр. Уларҙы эшләү буйынса кәңәштәр­ҙе Интернет селтәренән, төрлө китап­тарҙан табырға мөмкин.

Балаларҙы шатландырығыҙ

Яңы йыл – балаларҙың иң яратҡан байрамы. Кескәйҙәр өсөн ваҡыт йәл­ләмәгеҙ – тамаша ҡороғоҙ, тылсым эйәһе булып кейенегеҙ, ишек алдын­дағы ҡарға Ҡыш бабай эҙен һалығыҙ, күршеләрегеҙҙең ишек ҡыңғырауына баҫыуын һорағыҙ, ә был мәлдә бала­ғыҙға тәғәйенләнгән бүләкте шыршы төбөнә һалығыҙ, “Ҡыш бабай”ҙан хат яҙып, почта йәшнигенә төшөрөгөҙ, әкиәт һөйләгеҙ, уйындар ойоштороғоҙ.

Ит менән мауыҡмағыҙ

Байрамға кейгән кейемдең күк төҫтә булыуы мотлаҡ түгел. Тик ул ялтыра­уыҡтар, йәнлек тиреһе менән биҙәл­мәҫ­кә, иҙеүҙәре ябыҡ булырға тейеш.
Ҡатын-ҡыҙға сәсен бөҙрәләтеп, ағас ҡыҫтырғыс менән йыйып ҡуйырға кәңәш ителә.
Йылҡы кеүек үк, Ҡуй ит ашамай. Шуға күрә итле ризыҡтарҙы кәметергә, табынға йәшелсә, емеш-еләк, тәмләт­кес үләндәр ҡуйыу яҡшы булыр. Иткә килгәндә, тауыҡ, ҡуян итенә, балыҡҡа өҫтөнлөк бирегеҙ.

Ҡыңғырау сыңлаһын

Өйҙө яһалма ялтырауыҡтар урынына ағастан, йөндән йәки тиренән, тубырсыҡтан яһалған әйберҙәр менән биҙәргә тырышығыҙ. Ишеккә ҡың­ғырау элергә мөмкин – үҙенең сыңы менән ул ҡунаҡтарҙы ла, йыл хужаһын да сәләмләйәсәк.
Төрлө таҫмалар, ҡарағай, шыршы ботаҡтары үреме, йәшел үләндәр ҡуйылған вазалар һ.б. күберәк булһын. Бөтә биҙәүестәр күк төҫтә булмаһа ла ярай. Ҡуй йәшел, һары, аҡ, аҡһыл кө­рән төҫтәрҙе лә үҙ итә. Иң мөһиме – тәбиғи туҡымаларға һәм материал­дарға өҫтөнлөк бирелһен.

Иң ҡулайы –
тыуған йорт

Ҡуй тыуған йортон, өй йылыһын бик ярата. Әгәр мөмкинлек булһа, Яңы йылды ауылда, яҡындарығыҙ янында ҡаршылағыҙ.