Сибайҙағы “Строймеханизация” яуаплылығы сикләнгән йәмғиәтенең генераль директоры Нур Тажетдинов менән сираттағы тапҡыр Белем көнө алдынан ҡаланың Көнсығыш биҫтәһендә “Ҡурай” балалар баҡсаһы асылған көндә осраштыҡ. Балалар баҡсаһында урын етешмәүе, әсәләрҙең декрет ялынан һуң сабыйын ҡайҙа урынлаштырырға белмәй яфаланыуы хаҡында күп һөйләйбеҙ, күп яҙабыҙ. Был ҡырҡыу мәсьәлә Хөкүмәт кимәлендә лә өйрәнелде, мөһим ҡарарҙар ҡабул ителде. 2015 йыл аҙағына балалар баҡсаларына сират мәсьәләһен хәл итеү — көнүҙәк бурыс. Сибай яҡтарында иһә был проблема “Строймеханизация” йәмғиәтенең тырышлығы менән ыңғай хәл ителә.
Һуңғы өс йыл эсендә генә төҙөлөш ойош­маһы Сибайҙа бишенсе “ҡурай”ын төҙөп тап­шырған. Бынан тыш, Учалыла ла 220 урын­ға иҫәпләнгән баҡса сафҡа ингән. Әле Сибай янындағы Алтын ҡасабаһында 115 урынлыҡ тағы бер балалар баҡсаһы төҙөйҙәр. 2015 йылға тапшырырға ниәттәре.
– Ҡаҙаныштарҙы барлаған­да республика Хөкүмәтенең ярҙамын да билдәләп үтергә кәрәк. Өс йылда биш балалар баҡсаһы төҙөү – тәү сиратта эшлекле хеҙмәттәшлек һөҙөм­тәһе, – ти йәмғиәт етәксеһе.
– Һеҙҙең ойошма балалар баҡсалары төҙөү менән генә сикләнмәй шикелле? – тип һорайбыҙ Нур Азамат улынан.
– Йыл аҙағына тиклем 24 фатирлы алты йортто тапшырыу күҙаллана. Уларға башлыса авария хәлендәге өй­ҙәр­ҙә йәшәүселәр күсе­нәсәк. Бынан тыш, һатыуға ла төҙөй­бөҙ. Дөйөм алғанда, һуңғы дүрт йылда ошондай типтағы 24 йорт сафҡа инде. Әле бына тағы алтауға нигеҙ һалып торабыҙ, киләһе йәйгә өлгөр­төргә иҫәп. Әлбиттә, һәр баш­ланғыста яҡшы дуҫтар, уңған хеҙмәткәрҙәр булыуы шарт. Коллективымдан уң­дым.
— Ҙур коллективтың киләсәккә пландары ла шәптер, моғайын?
— Пландарыбыҙ ҙа, маҡ­сат­тарыбыҙ ҙа ҙур. Яңыраҡ Ырымбур өлкәһендә тимер юл вокзалын төҙөклән­дерә башланыҡ. Бер нисә бригадабыҙ Орск ҡалаһында эшләй. Магнитогорск ҡалаһын­да һатыуға йорт төҙөйбөҙ. “Бир­ҙәүеш” станцияһындағы ти­мер юл вокзалын төҙөк­лән­дерәбеҙ. Әле яңыраҡ Баймаҡ районында балалар баҡсаһы һәм мәктәп төҙөү бурысын йөкмәттеләр. Силәбе яҡтары­нан да заказдар бар. Бер һүҙ менән әйткәндә, тырышып эшләргә лә эшләргә.