Баш ҡалабыҙҙа “Әсә һәм бала” клиник госпиталенең асылыуы медицина өлкәһендә йәнә бер уңышлы аҙым булды.

Бындай заманса, юғары технологиялы медицина учрежде­ниеһы, Мәс­кәү ҡалаһы һәм өлкәһенән тыш, илдең башҡа бер төбәгендә лә юҡ. Шәхси инвестор 4,5 миллиард һум аҡса түгеп, мөһабәт ме­дицина учреждениеһы тө­ҙөт­кән һәм уны кәрәкле ҡора­малдар менән йыһазлан­дырған.
– Пациенттарға заманса бинала һәм уңайлы мөхиттә юғары технологиялы медицина ярҙамы күрһәтеләсәк, — тип белдерҙе Өфөләге “Әсә һәм бала” компаниялар төркөмөнөң генераль директоры Алһыу Нәзирова.
32 мең квадрат метр май­ҙанда урынлашҡан бала табыу йортонда, ҡатын-ҡыҙ консуль­тацияһында, балалар, ярҙамсы репродуктив технологиялар (ЭКО), диагностика, хирургия үҙәктәрендә, ашығыс ярҙам бүлексәһендә өлкән йәштә­геләргә һәм кескәйҙәргә медицина хеҙмәтләндереүе тәҡдим ителә. Өҫтәүенә түл­һеҙлек һымаҡ етди пробле­маларҙы хәл итергә лә, бөтә ғаилә ағзаларын дауаларға ла була.
Бында Мәскәү белгестәре лә эшләй. Мәҫәлән, госпиталдең баш табибы — билдәле акушер-гинеколог Борис Коноплев. Үҙебеҙҙең кадрҙарҙы әҙерләү маҡсатында йыл һа­йын Башҡортостан дәүләт медицина университетын та­мамлағандар клиник ординатура үтеү өсөн Мәскәүгә ебә­реләсәк һәм унан һуң клиникаға эшкә ҡайтарыла­саҡ. Был учреждение асылыу һө­ҙөм­тәһендә төбәктә 800 яңы эш урыны барлыҡҡа килә.