Был ҡала республикала ғына түгел, ил кимәлендә үҙенең үҫеше, төҙөклөгө һәм таҙалығы буйынса инде нисә йыл алдын­ғылар рәтендә килә. Стәрлетамаҡ быйылғы йылды ла уңышлы тамамлай.

Һуңғы осорҙа сәнәғәт өлкәһе буйынса ғына түгел, бар яҡлап та алға табан бара Стәр­ле­тамаҡ, ҡаланың йөҙө матурлана, тип әйтергә була. Хатта үҙ бренды булдырылды, ул “3” һаны менән бәйле: ҡаланың өс төп зонаһы бар, өс үҫеш дәүерен үткән һ.б.
Ҡала йөҙөнә килгәндә, ысынлап та, юлдарҙа, йорттарҙа күпләп эш башҡарыла. Әйтәйек, бер-ике йылда ғына ла әллә нисә ҡулса сафҡа инде, был йәһәттән урамдарҙағы тығындар хәл ителде. Шулай уҡ асфальт һалыу, йәйәүлеләр өсөн юл­дар булдырыу ҙа контролдә тотола. Бер генә миҫал: күптән түгел Хоҙайбирҙин урамы киңәй­телде, эш һөҙөмтәһе йәнә автоһәүәҫкәрҙәрҙең тор­мошон еңеләйтте, йәмәғәт автотранспортына тиҙерәк йөрөргә мөмкинлек бирҙе.
Бынан тыш, ҡаланың 2016 йылда үтәсәк 250 йыллығына әҙерлек эштәре ҡайнай. Стәр­ле­та­маҡтың тарихи урындарының әһәмиәтен боҙ­май ғына, заманса алымдар ҡулланып, матурлау планлаштырыла. Был йәһәттән шәхси инвес­торҙар ярҙам итә.
Әлбиттә, 2012 йыл һөҙөмтәләре буйынса (өсөнсө тапҡыр) Рәсәйҙәге иң төҙөк ҡала булып танылған Стәрлетамаҡ инфраструктураһының үҫеше бының менән генә сикләнмәй. Ғөмүмән, 270 меңдән ашыу халҡы булған был ҡала күп йәһәттән, ысынлап та, байтаҡ муниципаль берә­мек­тәргә һәм округтарға өлгө булырҙай.
Нисек кенә булмаһын, Стәрлетамаҡ – йәштәр ҡалаһы. Бында халыҡтың уртаса йәше – 36. Ғөмүмән, киләсәкте нисек күҙаллаһаҡ, йәш быуынды ниндәй кимәлдә ҡурсалаһаҡ, үҫтерһәк, ҡаланың иртәгәһе көнө шуға бәйле. Йәш ғаилә­ләргә балалар баҡсаларына, мәктәптәргә күпләп урындар кәрәк. Проблема, бәхеткә күрә, киләсәк­тә юҡҡа сығасаҡ. Шәхси балалар баҡсалары асылыу, яңыларын төҙөү, мәктәптәр булдырыу мәсьәләһе киләһе йыл аҙағына хәл ителәсәк. Мәҫәлән, 1000 урынлыҡ мәктәп төҙөү, киң профилле «Стәрлетамаҡ-Арена» физкультура-һауыҡтырыу комплексын сафҡа инде­реү, һәр мәктәптең яңыртылған йә иһә төҙөлгән спорт майҙансығы булыуы күп нәмә тураһында һөйләй.
Алдағы йылда 1600-ҙән ашыу ғаиләгә йорт төҙөү өсөн ер бүленәсәк. Теләүселәргә эш етерлек Стәрлетамаҡта. Һуңғы арала йәштәр араһында йүнселлектең үҫеүе лә, предприятие-ойошмаларға белгестәр­ҙең күпләп ҡайтыуы ла шатландыра. Ғөмүмән, ҡаланың киләсәге өмөтлө.