Берҙәм тауыш биреү көнөндә республикабыҙҙа 22 һайлау кампанияһы үтте. Уларҙың иң мөһиме ваҡытынан алда Башҡортостан Президентын һайлау булды. Юғары вазифаға дүрт кеше дәғүә итте: “Рәсәй патриоттары” партияһының төбәк бүлексәһе тарафынан күрһәтелгән Илдар Бикбаев, Коммунистар партияһынан Юнир Ҡотлоғужин, ЛДПР-ҙан Иван Сухарев һәм “Берҙәм Рәсәй” партияһының төбәк бүлексәһенән Рөстәм Хәмитов.

Ҡануниәткә ярашлы, иртәнге сәғәт 8-ҙә республика район һәм ҡа­лаларындағы 3453 һайлау участ­каһы ла үҙ эшен тот­ҡар­лыҡ­һыҙ башланы. Айырыуса ауыл халҡы әүҙем булды. Тәүге сәғәттәрҙән үк рейтингтың юғары баҫҡыстарына күтәрелгән Балтас, Баҡалы, Тә­тешле райондары, Ағиҙел, Сибай, Неф­текама ҡалалары көн дауамында ла беренселекте бирмәне. Башҡортостан Үҙәк һайлау комис­сияһының мә­ғлүмәттәренә ҡара­ғанда, республикала 3 027300 кеше һай­лаусы булараҡ тер­кәлгәйне, тауыш биреүҙә шулар­ҙың 74,89 проценты ҡатнашҡан. Былтыр иһә был күрһәткес 52,84 процент тәшкил иткән.
Президентлыҡҡа ярышта Рөстәм Хәмитов беренселеккә сыҡты. Башҡортостан Үҙәк һайлау комиссияһы мәғлү­мәт­тәренән кү­ренеүенсә, уның өсөн һай­лау­сыларҙың 81,71 проценты тауыш биргән. Юнир Ҡотлоғужиндың кандида­тура­һын халыҡтың 10,13 проценты хуплаған. Иван Су­ха­ревҡа ышаныс һөҙөмтәһе 4,81 процент булһа, дүртенсе баҫ­ҡыста Илдар Бикбаев — 2,62 процент.
Кампания барышында рес­пуб­ликалағы өс һайлау участкаһына билдәле шәхес­тәрҙең исеме бирелде. Улар — Советтар Союзы Геройы Таһир Кусимов (Әбйәлил районының Асҡар ауылында), генерал-майор Миңлеғәле Шайморатов (Ҡырмыҫҡалы районының Шайморат ауылында) һәм рус яҙыусыһы Сергей Аксаков (Бәләбәй районының Надеждино ауылында) исемендәге һайлау участкалары.