Кисә Стәрлебаш ауылында 120 урынға иҫәпләнгән балалар баҡсаһы асылды. Бала-сағаның сыр-сыу килеп уйнап йөрөгәненән дә йәмлерәк күренеш бармы икән ул?!

– Мин, үҫкәс, төҙөүсе булам! Ошон­дай матур баҡсалар төҙө­йә­сәкмен, – ти кескәй Искән­дәр.
– Ә мин – тәрбиәсе апай. Малай-ҡыҙҙарҙы ҡараясаҡмын, – тип Әнисә лә иғтибарҙы үҙенә йәлеп итергә тырыша. Осраҡ­лы һөйләш­мәй сабый­ҙар был темаға, ана бит, төҙөүсе ағай­ҙары Яңы йылға ниндәй шәп бүләк әҙерләгән – “Аҡбуҙат” исемле балалар баҡсаһында тәрбиәсе апайҙары хәҙер ҡыҙҙар-малайҙар менән бергә туп уйнаясаҡ, китап уҡыясаҡ.
Балалар баҡсаһына бынан теүәл бер йыл элек нигеҙ һа­лына. Әммә бер мәл: “Ишек­тәре тик ике-өс йылдан һуң ғына асылыр”, ­­– тигән хәбәр ишетелә. Бәхеткә күрә, республика Хөкүмәте, район хаки­миәте ты­рышлығы менән кес­­кәй­ҙәр унда бөгөн үк уйнап йөрөй.
– Был ваҡиға – беҙҙең өсөн сикһеҙ ҡыуаныс. Былтыр Мәҡ­сүттә бер нисә ауылды тәьмин итерлек бинаны үҙгәртеп ҡороу юлы менән асылған 85 урын­лыҡ балалар баҡса­һын иҫәпкә алмағанда, районда инде 24 йыл буйына мәк­тәпкәсә йәш­тәгеләр өсөн учреждение тө­ҙөл­­мәгән. Шуға уның төбәге­беҙ өсөн әһәмиәтен үҙегеҙ ҙә самалай ала­һығыҙ инде, – тине, кескәйҙәрҙе һәм ата-әсәләрҙе ҡотлап, район хаки­миәте башлығы Фәнүр Туҡтаров.
– Эш бик тиҙ башҡарылды, тө­ҙөүселәр бурысын яуаплы үтәне. Әйткәндәй, башҡа төбәктәр ике-өстө тырыштырғанда, был балалар баҡ­саһы быйыл беҙҙә – егерме һигеҙен­сеһе, – тип Башҡортостандың Тө­­ҙө­лөш һәм архитектура дәүләт комитеты рәйесе урынбаҫары Илдар Йәһүҙин кәйефте күтәрҙе.
Бина Стәрлебаш ауылының йәштәр биҫтәһендә урынлашҡан. Алдағы йылда тағы 800-гә яҡын ер участкаһы бүленәсәген иҫәпкә алғанда, тиҙҙән балалар баҡсаһы гөж килеп торор әле!