Һәр халыҡ үҙ ерендә бәхетле йәшәргә тырыша. Бала саҡта хәтфә үләндән йүгереп, саф һыулы йылға-шишмәләр кисеп, мең йәшәр урман­дарҙа ҡош һайра­уын тыңлап, емеш-еләк йыйып, балыҡ тотоп үҫкәндәр – йәшәү йәмен ысын мәғә­нәһендә татыған кешеләр.

Мин ғәзиз тыуған ерем Белорет райо­нында ике ауыл халҡын борсоған мәсьәлә – Уҫ­манғәле мәк­тәбенең яҙ­мышы ха­ҡында бәйән итмәк­семен.
1999 йылда төҙөлгән 108 урынлыҡ мәктәптә Арышпар, Ноҡат һәм Уҫ­манғәле ауылы бала­лары белем ала. Уҡыу­сылар һаны кәме­гәс, башланғыс кластар ғына ҡалдырылып, 2009 йылда ул Инйәрҙәге 2-се мәк­тәптең филиалына әй­ләнә. Бөгөн унда ни бары алты бала уҡый, шуға газ менән йы­лытылған, барлыҡ уңайлыҡтарға, ҙур спорт залына, иркен ашханаға эйә заманса мәктәптең киләсәге хәүеф аҫтында.
Бер көн мин Инйәр, Уҫманғәле халҡы менән мәктәп бинаһын балалар баҡсаһына үҙгәртеп ҡороу хаҡында һөйләшеп, ҡултамғалар йыйып, Белорет районы хакимиәте башлығы Владислав Мироновҡа мөрәжәғәт иттем. Ул белем усағының киләсәге тураһында аныҡ бер фекер ҙә әйтмәне, тик 2015 йылда Инйәр ҡасабаһында 120 урынлыҡ балалар баҡсаһы төҙөләсәген белдерҙе. Әйткәндәй, бөгөн был ике биләмәлә 380 бала оҙайлы сиратта тора, яңы баҡса тө­ҙөлһә лә, мәсьәлә тулыһынса хәл ител­мә­йәсәк. Шуға күрә ауылдаштарымды, яҡташта­рымды был мәсьәләгә ҡарата битараф булмаҫҡа саҡырам.