Өфө ҡала маршруттарындағы транспорттың торошо, халыҡты хеҙмәтләндереү кимәле күптәрҙе борсой. Күберәк табыш алыу маҡсатынан автобус водителдәре аҙым һайын ҡағиҙәне боҙа: тиҙлекте арттыра, бер-береһенең юлын киҫә, рөхсәт ителмәгән урында пассажирҙарҙы төшөрә... Кисә генә үҙем күңелһеҙ ваҡиғаның шаһиты булдым.
Иртәнге сәғәт 8-ҙә Сипайлово биҫтә­һе­нән телеүҙәккә йөрөгән 255а маршру­тының “ПАЗ” автобусына ултырҙым. Салонда халыҡ шығырым тулы. Өс туҡталыш уҙғандан һуң автобуста газ еҫе һиҙелә башланы. Кемдер, быға түҙә алмай, тәҙрәне асыуҙы үтенде. Ләкин еҫ бөтмәне. “Нур” театры” туҡталышынан ҡуҙғалып киткәндә хәл киҫкен ине.
– Автобусты туҡтатығыҙ! Мин сығам! – тип ҡысҡырҙым ахырҙа.
– Саҡ ҡына түҙә алмайһыңмы? Хәҙер “Ростов урамы”нда төшөрһөң, – тип екеренде водитель.
– Хәҙер үк туҡтатығыҙ! Тын алыуы ҡыйын! – тигәс, ул автобустың тормозына баҫты. Шул саҡ пассажирҙар кемуҙарҙан йүгереп салондан сыға һалды. Инде бөтәһе лә сығып бөткәс, нимәлер шартланы ла “тимер ат” гөлтләп яна башланы. “Һә” тигәнсә автобусты көслө ялҡын ялмап алды. Тирә-яҡҡа ҡуйы ҡара төтөн таралды...
Ҡыҙғанысҡа ҡаршы, бындай күңелһеҙ осраҡ Өфөлә тәүгеһе түгел. Йә тегендә автобустың бәрелеүе, йә бында юл ур­та­һында янып китеүе тураһында йыш ишетеп, күреп торабыҙ. Шуныһы эсте бо­шо­ра: аҙым һайын ҡағиҙәне боҙған эшҡыуар­ҙар­ға ҡарата бер ниндәй ҙә етди сара ҡул­ланылмай. Ҡала маршруттарын йө­рөт­кән малтабарҙар халыҡ хәүеф­һеҙ­ле­ген хәстәрләп бармай. Уларҙың төп маҡ­саты – күберәк килем алыу. Води­телдәрҙең арып, хәрәкәт барышында йоҡ­лап киткән осраҡтары ла булғылай. Автобустың техник торошон да күҙәтеүсе юҡ.
Өфөлә халыҡты ташыған эшҡыуар­ҙарҙың был башбаштаҡлығына күптән нөктә ҡуйырға кәрәк. Әллә тәртип булдырыу өсөн фажиғәлә кешеләрҙең мотлаҡ күпләп үлеүе кәрәкме?!