(Ә. Бикбулатова, “Шәхесте мыҫҡыл итеүме был?”,
2014 йыл, 18 ноябрь)

Гәзиттең 5 декабрь һанында белдерелеүенсә, Матбуғат йорто алдындағы Шәһит Хоҙайбирҙин һәйкәле янынан сүп-сар һауыты алынды. Өфө ҡала хакимиәтенең коммуналь хужалыҡ һәм төҙөк­ләндереү идаралығынан өҫтәп хәбәр итеүҙәренсә, быйыл көҙ ошо уҡ ерҙәге йылылыҡ трассаһын ремонтлаған “СТЭРС” ойошмаһы киләһе йыл яҙ һәйкәл нигеҙендәге йөҙләү ташын да йүнәтәсәк. Тимәк, баш ҡала­быҙҙың тарихи урындарының береһе киләсәктә лә тирә-яҡты йәмләп торасағына өмөт бар.

“Дуҫ”тан абай булығыҙ!

(Кәримә Усманова, “Эт кешегә дуҫмы, дошманмы?”, 2014 йыл, 29 октябрь)

Сибайҙың торлаҡ-коммуналь хужалыҡ идаралығы мәҡәләгә яуап хатында ҡала ветеринария станцияһының хужаһыҙ эттәргә ҡаршы даими эш алып барылыуы тураһында яҙа. Идаралыҡтың ҡорамал, транспорт һәм берәҙәк хайуандарҙы юҡ итеү өсөн төрлө кәрәк-яраҡ менән тәьмин ителгәне хаҡында ла мәғлүм. Йыл башынан үткәрелгән рейдтар һөҙөмтәһендә 904 эт атылған. Халыҡ берәҙәк йорт хайуандары мәсьәләһе буйынса торлаҡ-коммуналь хужалыҡ идаралығына хәбәр иткән осраҡта, мөрәжәғәт тиҙ арала сара күреү өсөн ҡала ветеринария станцияһына еткерелә. Шул уҡ ваҡытта эттән барыбыҙ ҙа һәр саҡ абай булырға тейешбеҙ.

Гөлсәсәк ҒӘБИТОВА әҙерләне.