Бәләкәй генә ауылда йәшәһәк тә, беҙҙә тетрәндергес, уйға һалырлыҡ ваҡиғалар булып тора.

Көн кискә һарҡып, эңер төшөр алдынан әбейем менән көтөү ҡаршыларға урамға сыҡтыҡ. Күп тә үтмәне, ҡаршы тауҙан – Түмәләстән – һарыҡ-кәзә килеп тә төштө. Мин малды ишек алдына ҡыуып индерҙем, әбейем эскәмйәлә ултырып торам тип ҡалды. Малды урынлаштырып сығы­уыма ул, әйтеүе буйынса, бик тетрәндергес хәлгә тарыған.
– Түбән остан өс-дүрт йәшлек малай самокатта килеп сыҡты ла, ҡапыл боролоп, минең янға килде. “Инәй, бына, атайым утын һатып, миңә вәләсәпит алып бирҙе”, – тип ҡыуанысынан ни эшләргә белмәй, шатланып һөйләне ул. Бәхетенең сикһеҙ икәнлеге әллә ҡайҙан күренеп тора, – тип бәйән итте әбейем.
Ошонан теүәл бер тәүлек алда кис НТВ каналында “С жиру бесятся?” тапшырыуын ҡарарға тура килде. Унда Рәсәй, донъя кимәлендә танылыу яулаған сәхнә йондоҙ­ҙарының концерт ҡуйып, ил гиҙгәндә күпме, нисек аҡса туҙҙырыуы хаҡында һүҙ бара ине. Тәүлегенә 30 мең һумлыҡ ҡунаҡхана бүлмәләре, алтын ялатылған ванна, санузелдар, рауза таждары һибелгән түшәк-иҙәндәр...
Шатлығынан ауыҙы ҡолағына еткән сабыйҙы осрат­ҡан кистә телевизорҙы тоҡандырыр алдынан байтаҡ ҡына һөйләшеп ултырҙыҡ. Ауылдағы эш урындары бармаҡ менән генә һанарлыҡ: бер уҡытыусы, фельдшер, мәк­тәп йыйыштырыусы, ике газ операторы, бер һатыусы һәм клуб мөдире. Бер нисә кеше – күрше ауылдағы фермала, бәғзеләр Себер тарафтарында эшләй.
Үрҙә әйтелгәндәрҙән сығып, ошондай һорау тыуа: беҙ ҡайҙа барабыҙ? Илдәге хәл былай дауам итһә, ҡайҙа барып төртөлөрбөҙ?! Берәү балаһына велосипед бүләк итер өсөн түләп ағас яҙҙырта, ҡырҡып алып ҡайта, яра, һата. Бының өсөн кәмендә биш-алты көн ваҡыт кәрәк. Ә Пугачева, Киркоров кеүектәр бер кистә 30-ар мең һум аҡса туҙҙыра, был аҡсаға 10 велосипед алып була... Уйланырға урын бар.