Башҡортостан Республикаһының Эшҡыуарлыҡ аҙналығында “Йыл эшҡыуары-2014” бәйгеһендә еңеүселәргә наградалар тапшырылды.

Быйыл ойоштороу комитетына 12 номинация буйынса 78 ғариза тапшырыл­ған. Ҡатнашырға теләк белдергәндәрҙең күбеһе – Күмертауҙан. Бәйгене Башҡор­тостандың Эшҡыуарлыҡ һәм туризм буйынса дәүләт комитеты, республиканың Эшҡы­уарлыҡ ойошмалары ассоциация­һы, Сауҙа-сәнәғәт палатаһы, “Рәсәй таянысы” Башҡортостан төбәк бүлексәһе, “Эшлекле Рәсәй” йәмәғәт ойошмаһының республика бүлексәһе, бәләкәй эшҡыуар­лыҡты үҫтереү һәм уға ярҙам фонды ойошторҙо.
Һөҙөмтәләргә ярашлы, Өфө ҡалаһын­дағы “Макспром” яуаплылығы сикләнгән йәмғиәтенең башҡарма директоры Илдар Хужин — “Етештереү өлкәһендә йылдың иң яҡшы эшҡыуары”, баш ҡалабыҙҙан шәхси эшҡыуар Павел Зелев — “IT технологиялар өлкәһендә йылдың иң яҡшы эшҡыуары”, Туймазынан “Экология Т” яуаплылығы сикләнгән йәмғиәте директоры Илнур Шакиров “Экологик йүнсел­лек өлкәһендә йылдың иң яҡшы эш­­ҡы­уары” тип танылды. Шаран районынан крәҫтиән (фермер) хужалығы баш­лығы Рәмилә Сәмиғуллина “Иң яҡшы крәҫтиән (фермер) хужалығы” номина­ция­һында еңеп сыҡты. Өфөнән “Цифроград” компаниялар төркөмө етәксеһе Азат Иҫәнғолов — “Күмәртәләп һәм берәмләп сауҙа итеү өлкәһендә йылдың иң яҡшы эшҡыуары”, Бәләбәй районының Приют ҡасабаһындағы “Витязь” яуап­лылығы сикләнгән йәмғиәте директоры Виктор Никулин — “Йәмәғәт туҡланыуы өлкәһендә йылдың иң яҡшы эшҡыуары”, Күмертауҙан “Акрополь” йәмғиәтенең генераль директоры Хәйҙәр Ғайсин — “Төҙөлөш өлкәһендә йылдың иң яҡшы эшҡыуары”, Әбйәлил районынан шәхси эшҡыуар Айрат Әминев — “Хеҙмәт күрһәтеү өлкәһендә йылдың иң яҡшы эшҡыуары”, Октябрьский ҡалаһынан “Бағымсы +” яуаплылығы сикләнгән йәм­ғиәте директоры Анатолий Кузнецов — “Медицина һәм һаулыҡ һаҡлау өлкәһендә йылдың иң яҡшы эшҡыуары”, Нуриман районынан “Павловка паркы” туристик тау саңғыһы үҙәген ойоштороу­сы Раил Ғәзизов “Туризм өлкәһендә йылдың иң яҡшы эшҡыуары” тип билдәләнде. Өфө ҡалаһынан “Уңыш академияһы” үҙәгенең генераль директоры Гүзәл Горбунова “Социаль эшҡыуарлыҡты үҫтергән өсөн”, ә Күмертауҙан Эшҡыуарҙар союзы рә­йесе Елена Ульянкина иһә “Эшҡыуарлыҡ берләшмәһе мәнфәғәт­тәрен яҡлауҙағы хеҙмәте өсөн” номинацияһында еңеүгә өлгәште.