– Юл хәрәкәте хәүефһеҙлеге ҡағиҙә­лә­ренең, урамдағы билдәләрҙең йыш үҙгә­реп тороуы водителдәргә, айырыуса ҡа­ла­ны­ҡыларға, мәшәҡәт тыуҙыра. Күп­тәр яңы­лыҡтарҙы белмәй ҡалып, төрлө уңайһыҙ хәлгә тарый, матди яҡтан зыян күрә. Ошо йәһәттән ни әйтерһегеҙ, Нур­мөхә­мәт хәҙрәт?

Руслан АВЗАЛДИНОВ.
Иглин районы.

– Бисмилләһир-рахмәнир-рахим!
Хөрмәтле ҡәрҙәш­тәр, тормош һис ҡа­сан да бер урында тормай. Әйтәйек, бо­рон кешеләр күберәк йәйәү йөрөгән, юлды дөйәлә, карапта үт­кән мәлдәр ҙә булған. Хәҙер иһә машинала, самолетта, теплоходта хәрәкәтлә­нә­беҙ. Йөрөштөң тиҙ­ле­ге лә үҙгәрҙе. Мәҫәлән, еңел машиналарҙыҡы – сәғәтенә уртаса 70 – 80 саҡрым тирәһе. Хатта ки унан да арт­тырғандар бар. Автомобиль сәғәтенә 90 саҡ­рым тиҙлек менән барған хәлдә бер секундта 20 метр тирәһе ер уҙа. Тимәк, 100 метрлыҡ ара дүрт секундта үтелә тигән һүҙ. Ифрат ҙур тиҙлек бит!
Ерҙең әйләнеүе, ҡояштың ҡалҡыуы, байыуы, йондоҙҙарҙың хәрәкәт итеүе – барыһы ла Аллаһ Тәғәләнең ҡануны буйынса бара. Йылға ағышының да үҙ ҡағиҙәһе бар. Мәҫәлән, Өфөнә уратып аҡҡан Ағиҙел, Ҡариҙел, Дим йылғалары бормалы юл үтмәһә, туп-тура, ҙур тиҙлек менән аҡһа, экологияға, үҫемлектәргә, балыҡтарға ҙур зыян килер ине.
Юл хәрәкәтендәге ҡанундар ҙа теүәл үтәл­һә, тормошобоҙға зарар килмәҫ, бәлә-ҡаза урап үтер. Ошо йәһәттән пәйғәмбәребеҙ Мө­хәммәт ғәләйһис-сәләмдең мөбәрәк хәҙисе бар. Бер ғәрәп дөйәнән төшкән дә: “Эй, Раббым, үҙеңә тапшырҙым”, – тип йәһәт кенә китергә булған. “Көтөп тор, ашыҡма, – тип туҡтатҡан уны Пәйғәмбәребеҙ. – Тәүҙә дөйәң­де яҡшылап ҡара, тыша, унан Аллаһ Тәғәләгә тапшырырһың”. Тимәк, һәр саҡ иғтибарлы, яуап­лы булыу зарур. Шуны күҙ уңында тот­ҡанда, юл хәрәкәте хәүефһеҙлеге ҡағиҙә­лә­ренең йыш үҙгәреп тороуынан тик яҡшылыҡ эҙләргә кәрәк. Руль янында ултырған кеше машиналағы ғаилә ағзаларының, яҡындары­ның, шулай уҡ башҡа техникалағыларҙың ғү­мере өсөн ҙур яуаплылыҡ тойорға, ашыҡмаҫҡа тейеш. Көндән-көн тиерлек тулылана барған юлдарҙа хәүеф-хәтәр һағалап ҡына тора. Үҙ­гәрештәрҙе, тыйыуҙарҙы йыш индереп, дәүләт кешелекте ошо ҡурҡыныстарҙан араларға тырыша, именлек һағында тора. Ә водитель “яңы­лыҡтар мәшәҡәт тыуҙыра” тип зарлан­маҫҡа, һәр нәмә менән ҡыҙыҡһынып барырға, белемен даими камиллаштырырға бурыслы. Мәғлүм булыуынса, хәҙер автомәктәптәрҙең эшмәкәрлегенә, уҡытыу программаһына ла үҙгәреш индерелде. Был да юҡтан түгел – юлда тәртип көслө булырға тейеш.
Аллаһ Тәғәлә бер-беребеҙгә ихтирам-хөр­мәт күрһәтеп йәшәргә насип ҡылһын. “Ирҙе һынағың килһә, юлға сыҡ”, “Һаҡланғанды һаҡ­лар­мын” тигән мәҡәлдәрҙе һәр саҡ иҫтә тотайыҡ, ғаиләбеҙ ағзалары, башҡа кешеләр алдында ышанысты юғалтмайыҡ, уларҙы һаҡлайыҡ, хөрмәтле ҡәрҙәштәр. Әс-сәләмү-ғәләйкүм үә рәхмәтул-лаһи үә бәрәкәтүһ! Амин.