Райондың үҙәк дауаханаһына килеп кереү менән таҙалыҡ, төҙөклөк, тәртип, заманса йыһаздар күҙгә салына. Күп район һәм ҡала ойошмалары көнләшерлек. Бындағы бөхтәлеккә һоҡланып ҡайттыҡ. Барыһы ла – йылдар дауамындағы берҙәм коллективтың, беренсе сиратта, уның етәксеһе баш табип Азат Әхмәт улы Байгилдиндың тырышлығы.
Төрлө йүнәлешле — терапия, неврология, гинекология, хирургия, педиатрия, бала табыу, анестезия-реанимация бүлексәләре, консультация-диагностика үҙәге уңышлы эшләй, заман талаптарына тулы­һын­са яуап бирә.
Ейәнсура районында медицина ярҙамына мохтаж булғандарҙы ҡабул итерлек йәмғеһе алты дауалау пункты бар: Иҫәнғолдағы үҙәк, ике ауыл участка дауаханалары, өс ауыл амбулаторияһы. Район үҙә­гендәгеһе тәүлегенә 500-ҙән ашыу кешене хеҙмәтләндерә. Бюджет өлкәһендә һәм һаулыҡ өсөн хәүеф­ле шарттарҙа эшләүселәргә йыл һайын өҫтәмә диспансерлаштырыу мөмкинлеге тыуған.
Коллектив тәжрибәле табиптар­ҙан һәм урта медицина хеҙмәткәрҙә­ренән – 447 белгестән – тора. Шу­ны­һы ҡыуаныслы: быйыл ғына өс йәш табип эшкә килгән. Бар ғүмерен һаулыҡ һаҡлауға арнаған, ҡырҡ йыл­дан ашыу акушер-гинеколог булып эшләгән Ғәфүр Дәүләткирәй улы Мәһәҙиев тә әңгәмәлә был турала телгә алды:
– Әлеге көндә беҙҙең бүлектә дүрт табип эшләй. Үҙемдең тәж­ри­бәне йәштәр менән уртаҡлашам, уларҙан да күп нәмәгә өйрәнәм. Дүрт йыл элек беҙгә йәш белгес Гөлфирә Исмәғилева килде. Ул ты­рыш, булдыҡлы. Бергәләп әсәләргә һау-сәләмәт бала табырға ярҙам­лаша­быҙ. Йәнә Ишемғол, Абҙан, Үтәғол, Байыш ауылдарында ла тәжрибәле фельдшерҙар эшләй. Тыуымға килгәндә, Иҫәнғол, Иҙәш, Иҙелбәк ауылдарында ул юғары.
“Һаулыҡ һаҡлау” өҫтөнлөклө милли проектына ярашлы, район­дың дауалау учреждение­ларының матди-техник базаһы шаҡтай яҡшыр­тылған. Дауалау-диагностика ҡорамалдары, лаборатория комплексы, ультратауыш менән тик­шереү, рентген аппараттары, гис­­тероскоп алынған. “Ашығыс яр­ҙам” автопаркы яңы санитар автомашиналары менән тулылан­дырыл­- ған. Дауахана мәғлү­мәт­тәренә ҡара­ғанда, туғыҙ айҙа районда 292 бала тыуған, 273 кеше үлгән.