Унда Башҡортостан Яҙыусылар союзы рәйесе Наил Ғәйетбаев Ғәзим ағайға бәйле йылы хәтирәләре менән уртаҡлашты, халыҡ өсөн башҡарылған фиҙакәр эшмәкәрлеген билдәләне.
– Үҙгәреш заманында тап Шафиҡов һымаҡ публицистар беҙгә йүнәлеш бирҙе, – тине ул. – Ғәзим Ғәзиз улы бик йомарт, ихлас кеше булды. Белемле, уҡымышлы, тура һүҙле, ғәҙел шәхес ине.
– Осрашыу бик матур ойошторолған, – тип ҡыуанысын белдерҙе Башҡорт­остандың халыҡ шағиры Рауил Бикбаев. – Ғәзим, Ҡырғыҙстанда тыуһа ла, баш­ҡорт рухлы булды. “Башҡортостанды күрмәһәм дә, уны һағындым”, – тигәйне ул бер саҡ. Ярһыу кеше ине, һәр хәл-ва­ҡиғаға тиҙ арала фекерен әйтә торғайны. Күп ауырлыҡ кисерергә тура килде уға, әммә үҙен юғалтманы. Халҡыбыҙҙың фольклорына сумды, уның өлгөләрен күпләп урыҫ теленә тәржемә итте. Ғәзим Шафиҡов 80-се йылдарҙа публицистик сығыштары менән республиканан ситтә танылыу яуланы, уның хеҙмәттәре яңы­лыҡ, асыш булды.
Башҡортостандың һәм Рәсәйҙең ха­лыҡ артисткаһы Таңсулпан Бабичева иһә Ғәзим Шафиҡов ижад иткән әҫәр­ҙәрҙә уйнауын, авторҙың кәңәш-дәрес­тәрен, йылы һүҙҙәрен иҫкә алды.
– Әҙиптең хеҙмәте ваҡытында тейеш­ле кимәлдә баһаланманы, – тип күңел әрнеүе менән бүлеште ул. – Барыһына ла өлгөрөргә тырышып, янып йәшәне. Уның хеҙмәттәре алдында баш эйәм. Йәштәр Ғәзим Ғәзиз улының әҫәрҙәренә яңынан күҙ ташлап, тейешенсә баһа бирергә тейеш.
– Урыҫ телендә яҙған рухлы башҡорт балаһы булды ул, – тип өҫтәне Рәшит Шәкүр. – Башҡорт рухи донъяһын урыҫ әҙә­биәте менән тоташтырҙы. Халҡы ал­дындағы изге бурысын тулыһынса үтәне.
Шағир Ирек Кинйәбулатовтың һүҙҙәре лә бик хаҡ:
– Заманыбыҙҙың бөйөк улы Ғәзимгә ҡарата төп һүҙҙәр киләсәктә әйтелер, уның исемендәге урам, мәктәп булыр. Был уның замандаштарына түгел, һеҙгә – киләсәк быуынға — кәрәк!
Ирек Кинйәбулатовтың “Ут булдың” исемле шиғыры, әйткәндәрен тулыландырып, йөрәккә үтеп инде.
Сараны ойоштороусылар Ғәзим Ша­фиҡовтың ялҡынын сәсеп, тамашасылар күңелендә ут ҡабыҙҙы. Ҙур рәхмәт уларға!