Рөстәм Зәки улының фекеренсә, Совет зама­нындағы планлаштырыу нигеҙҙәре артыҡ булған һәм йәмғиәтте боҙған. Әммә уларҙан баш тартыу һөҙөмтәһендә «беҙ ниндәйҙер идара итеп һәм контролдә тотоп булмаған хәлгә төштөк». Берҙәм маҡсаттың юҡлығы предприятиеларҙың тарҡалы­уына килтерә, шуға күрә тауар һатыу баҙарын юғалтабыҙ.
— Совет дәүерендә Башҡортостандың нефть эшкәртеү, нефть химияһы, химия комплексы берҙәм кластерға тупланғайны. Предприятиелар үҙ-ара бәйләнештә булып, ресурс ағымын дөрөҫ формалаштырған ине, — тине республика Президенты. – Бөгөн был кластер бик күп өлөшкә бүленгән. Уның биш хужаһы бар. Совет заманына ҡарағанда нефть эшкәртеү, нефть химияһы, химия комплексы өс тапҡырға аҙыраҡ тауар етештерә. Бынан кем ота? Беҙме? Юҡ. Был предприя­тиеларҙың хужаларына, бәлки, насар түгелдер. Әммә ошо эштә, һис шикһеҙ, маҡсатлы план кәрәк.
Ярты йыл эсендә йорт йәки ҡунаҡхана күтәреп ҡуйырға, ҙур предприятиеға нигеҙ һалырға мөмкин. Ә бына кадрҙар әҙерләү еңел түгел, был эш тиҫ­тәләрсә йыл талап итә. Белгестәр мәсьәләһе киләһе йыл Өфөлә үтәсәк саммит алдынан айырыуса көнүҙәк. Хеҙмәтләндереү кимәле юғары булырға тейеш. Әҙерлекле кадрҙар хеҙмәтләндереү өлкәһендә генә түгел, башҡа тармаҡтарҙа ла талап ителә. Айырыуса эшсе һөнәрҙәренә ихтыяж ҙур. Тик эшһеҙлек күләме кәмемәй. Тимәк, ойошма-предприятиеларҙың шарттары йәки хеҙмәт хаҡы белгестәрҙе ҡәнәғәтләндермәй, икенсенән, хеҙмәт баҙары менән кадрҙар әҙерләү системаһы араһында бәйләнеш юҡ.
Рөстәм Хәмитов әйтеүенсә, әле был өлкәлә эш һүлпән бара. Ул кадрҙар системаһындағы өс проб­леманы билдәләп үтте. Тәүгеһе – хеҙмәт йәшендәге кешеләрҙең кәмеүе. Тимәк, белгестәрҙе маҡсатҡа ярашлы әҙерләргә кәрәк. Бының өсөн инде хеҙмәт баҙары менән белем биреү тармағы араһын­да бәйләнеш булырға тейеш. Был тәңгәлдә ыңғай һөҙөмтәгә бер нисә уҡыу йорто ғына өлгәшкән.
Тағы бер проблема – миграция. Башҡортостан халҡының ете проценты, йәғни 100 меңдән ашыу кеше ситтә эшләй. Киләсәк­тә бел­гестәрҙе үҙебеҙҙә ҡалдырыу өсөн уларға яҡшы эш һәм йәшәү шарттары тыуҙырыу талап ителә, тип билдәләнде йыйында.
Әле республикала тыуым күрһәткесе юғары, былтыр 60 мең сабый донъяға килгән. Был балалар хеҙмәт йәшенә еткәнсе кадрҙар системаһында бушлыҡ тыуҙырмау мөһим. Ошо маҡсатта 2018 йылға тиклем махсус программа ҡабул ителгән.
Тағы бер мәсьәлә – сифат кимәле. Үҙ эшенең оҫтаһы лайыҡлы баһаланырға тейеш.
Хеҙ­­мәт кешеһе, уның аҡыл һәм ҡул көсө иҡтисадты үҫтергән төп фактор булып тора. Әммә әле был ҡеүәт һөҙөмтәле һәм заман талабына ярашлы файҙаланыла тип әйтеп булмай.
Рөстәм Хәмитов билдәләүенсә, кадрҙар системаһына яңыса ҡараш талап ителә. Әле күп урында иҫкесә эшләү дауам ителә, яҡшы урындарға таныш-белеш алына, хеҙмәткәрҙәр мөмкинлеге, һәләте буйынса баһаланмай.
Төбәк-ара кадрҙар йыйынында ошо һәм башҡа көнүҙәк мәсьәләләр ҡаралды. Сарала ҡатнашҡан 600-ҙән ашыу белгес төрлө “түңәрәк өҫтәл”дә фекер алышты, тәжрибә уртаҡлашты.