Район хакимиәте башлығы Рәмил Бохаров әйтеүенсә, һуңғы йылдарҙа Ғафуриҙа умартасылыҡ тотороҡло үҫешә. Шул уҡ ваҡытта тармаҡтың һөҙөмтәлелеген күтәреү, продукциянан килем ала башлау көнүҙәк мәсьәлә булып тора. Был йәһәттән илдәге, донъялағы алдынғы тех­нологияларҙы ҡулланыу мөһим. Мәҫәлән, Стәрлета­маҡтан Рөстәм Резбаев күптән инде Канада технологияһы буйынса эш итә, тонналап бал етештерә. Йыйылышҡа ул хужалығы менән яҡынданыраҡ таныштырыу маҡсатында видеофильм төшөрөп алып килгәйне. Йүнселдең умарталығында 700 – 800 баш күс иҫәпләнә. Унда сит илдә етештерелгән йөк тейәгестәр эшләй. Улар ярҙамында бер юлы дүрт дәдәнде корпустары менән бергә күтәреп, оҙон арбалы “КамАЗ” автомашинаһына тейәргә мөмкин. Бындай техника эштең ҡыҙыу осоронда умарталарҙы бер урындан икенсеһенә тиҙ арала күсереп алып китергә мөмкинлек бирә. Кәрәҙле рамдарҙы берәмләп түгел, ә корпустары, магазиндары менән бергә тейәп алып китәләр ҙә махсус амбарҙа балын һарҡытып алалар. Канада технологияһы буйынса был эште бер нисә көндә атҡарып сығырға мөмкин. Кәрәҙле рамдарҙың ҡыналарын алыу өсөн дә махсус станок ҡулланыла, ул да ваҡытты экономиялай.
Канаданан килгән умартасы Михаил Куцыйҙың әйтеүенсә, Канада климаты Башҡортостандыҡынан әллә ни айырылмай. Тәбиғәт шарттары, бал биргән үҫемлектәрҙең күплеге йәһәтенән уртаҡлыҡтар байтаҡ, әммә өҫтөнлөк – Башҡортостан яғында. Республикабыҙҙың йүкә урмандарына бай булыуы юғары сифатлы бал етештерергә мөмкинлек бирә. Тик уны тулыһынса файҙаланмайҙар. Мәҫәлән, беҙҙәге умартасылар һәр күстән уртаса 30 – 35 килограмм бал алһа, Канадала 60 килограмм етештереү ғәҙәти күренеш иҫәпләнә. Заманса технологиялар ярҙамында өлгәшәләр бындай уңышҡа. Беҙҙә иһә ата-бабаларыбыҙҙың алымдары ҡулланыла. Эш ҡоралдары ла үҙгәрмәгән. Барыһы ла ҡул көсө менән башҡарыла, шунлыҡтан балдың үҙҡиммәте лә юғары.
Михаил Куцый үҙ хужалығындағы 800 баш умартанан йылына 50 тонна бал етештерә һәм уны күмәртәләп һата, 200 мең доллар (9,2 миллион һум самаһы) аҡса эшләй. Бынан тыш, үҙенең фасовкалау цехы бар. Уның белдереүенсә, Башҡортостандан йылына 200 тонна бал һатып алырға мөмкинлеге бар. Тик бының өсөн Канада закондарына яраҡлашыу талап ителә.
Донъя баҙарындағы хаҡтар менән дә таныштырҙы Михаил Куцый. Канадала асыҡ төҫтәге балдың 1 килограмы 4,2 доллар тора. Унда умартасылар кооперативтарға берләшеп, продукцияны бер урынға туплап, күмәртәләп һатырға ғәҙәтләнгән.
– Беҙҙә балды байтаҡҡа күберәк етештереү мөмкинлеге бар. Байлыҡ аяҡ аҫтыбыҙҙа ята, уны дөрөҫ файҙаланып, аҡсаға әйләндерергә генә кәрәк. Илебеҙ нефть кенә түгел, бал һатыу буйынса ла донъяла алдынғылар рәтенә сығырға тейеш, – тине район хакимиәте башлығы Рәмил Бохаров, йыйылышты йомғаҡлап.