Дауахана 182 урынға иҫәпләнгән. Поликлиника тәүлегенә яҡынса 550 кешене хеҙмәтләндерә. Байым һәм Урал ауылдарында участка дауаханалары бар. Амангилде, Ташбулат, Таштимер, Йәнгел ауылдарындағы табип амбулаторияһында 14 урынға иҫәпләнгән көндөҙгө стационарҙар уңышлы эшләй.
Коллектив тәжрибәле табиптарҙан һәм урта медицина белгестәренән тупланған. Уларҙың күбеһе дауаханала тәүге көндәрҙән үк эшләй, һәр ҡайһыһы хеҙмәтенә бар һәләтен һәм тырышлығын һала. Һаулыҡ һағында 80-дән ашыу табип торһа, шуның 60-тан күберәге үҙәк дауаханала эшләй. Урта медицина хеҙмәткәрҙәре 326 кеше тәшкил итә. Аҡ халатлылар араһында өс табип “Рәсәйҙең һаулыҡ һаҡлау отличнигы”, бишәүһе “Башҡортостандың атҡаҙан­ған медицина хеҙмәткәре”, 23-ө “Башҡортостандың һаулыҡ һаҡлау отличнигы” исемен йөрөтә. Был күрһәткестәр дауаханала һәләтле, эшен яратҡан хеҙмәткәрҙәр эшләүе тураһында һөйләй.
“Һаулыҡ һаҡлау” өҫтөнлөклө милли проектына ярашлы, райондың дауалау учреждениеларында матди-техник база шаҡтай яҡшыртылған. Дауалау-диагностика ҡорамалдары, ультратауыш менән тикшереү, рентген аппараттары, лаборатория комплексы, гистероскоп алынған. Бынан тыш, “Ашығыс ярҙам” автопаркы яңы санитар автомашиналары менән тулыландырылған. Ошо арҡала бюджет өлкәһендә һәм һаулыҡ өсөн хәүефле шарттарҙа эшләгәндәргә йыл һайын өҫтәмә диспансерлаштырыу үткәрелә.
“Ауыл табибы” программаһы буйынса районға эшкә 28 белгес ҡайтҡан. Район хакимиәте уларҙы торлаҡ менән тәьмин итеүҙә ҙур ярҙам күрһәткән.
Дауахананың баш табибы – район халҡының һаулығы өсөн янып-көйөп йәшәгән шәхес. Төрлө күрһәткестәр буйынса хәлде ыңғай баһалай ул. Әммә һуңғы йылдарҙа ауылдарҙа эскелектең көслө булыуына йәне әрней.
– Районда тыуым буйынса хәл тотороҡло, йыл да 800 самаһы сабый донъяға килә. Республика төбәктәре күрһәткестәре буйынса бишенсе йыл рәттән өсөнсө урында киләбеҙ. Шул уҡ ваҡытта үлем осраҡтарының йышайыуы борсой. Айырыуса эшкә һәләтле кешеләрҙең иртә вафат булыуы хафаландыра. Шуға ла участка терапевтарының эшен яйға һалып, мөмкин тиклем күберәк кешене күҙ уңында тотоуҙарын тәьмин итергә тырышабыҙ. Нисек кенә булмаһын, халыҡ һаулығын һаҡлау – тәүмаҡ­сатыбыҙ һәм эшебеҙҙе ошо йүнәлештә һөҙөмтәлерәк ойошторорға тейешбеҙ. Был йәһәттән табиптарҙың ауырыуҙарға иғтибарлы булыуы мөһим, – ти Заһир Фәтхелбаян улы.
Артабан терапия бүлексәһе хеҙмәткәрҙәре менән таныштыҡ. Уға Айгөл Игеҙәкова етәкселек итә. Йәш табибә хеҙмәт юлын ошо дауаханала 1999 йылда табип-рентгенолог булып башлаған.
– Бүлектә 31 урын бар. Ауырыуҙарға уңайлы булһын өсөн барыһын да эшләргә тырышабыҙ. Эшемдә тәжрибәле табиптар Булат Усманов, Нәйлә Ғарраповаларға таянам. Шәфҡәт туташтары Фирҙәүес Моталлапова, Роза Вафина, Резеда Ғәлина, Миләүшә Ғәлиуллина, Миләүшә Оморҙаҡова, Фәймә Мөхәмәтйәнова, Гүзәл Әсәҙуллина – алыштырғыһыҙ ярҙамсыларым, – ти Айгөл Иршат ҡыҙы.
Беҙ килгәндә табибә яңы дауаханаға эләккән Мәрфуға инәй Ямалованы ҡабул итә ине.
– Мәйгәште ауылында йәшәйем. Асҡарға ҡыҙыма ҡунаҡҡа килгәйнем, ҡан баҫымым күтәрелеп китте. Ошо бүлексәгә һалдылар. Йылына бер-ике мәртәбә дауаланып алам. Йылы һүҙҙәре менән дә сихәт бирәләр. Аяҡҡа баҫтырыр өсөн көстәрен дә, ваҡыттарын да йәлләмәйҙәр, – тине оло йәштәге инәй.


Реклама