Вадим СӘЙФУЛЛИН, “Аҡҡош” яуаплылығы сикләнгән йәмғиәте директоры, Ҡыйғы районы:
– Үҙенә насарлыҡ теләмәгән эшҡыуар бер ҡасан да сифатһыҙ тауар сығармаҫ. Әгәр кеше шундай кейем, көнкүреш кәрәк-ярағы йә ризыҡ алып отолһа, ҡабат һиңә мөрәжәғәт итмәйәсәк. Шуға ла беҙ эшебеҙҙә тәү сиратта сифатты хәстәрләйбеҙ. Мәҫәлән, былтыр ике мең самаһы ҡаҙ үҫтереп һаттыҡ. Бының өсөн үҙебеҙҙең махсус һуйыу, эшкәртеү цехы бар. Бөтә эште лә ҡул менән башҡарабыҙ. Әҙер тауар һыуытҡыста оҙаҡ ятмай. Ҡаҙ мамығын, Мәскәүҙәге ойошма менән килешеү төҙөп, килограмын 500 һумдан һатабыҙ. Ҡасандыр халыҡ диңгеҙ аръяғынан килгән “Буш боттары” тип иҫе китһә, хәҙер үҙебеҙҙә үҫтерелгәненә өҫтөнлөк бирә. Республиканың төньяҡ-көнсығыш төбәгендәге биш район, шулай уҡ Ырымбур, Свердловск, Силәбе өлкәләре, Пермь крайы халҡы беҙҙән ҡош-ҡортто даими һатып ала.
Фәрит ЗАҺИҘУЛЛИН, пенсионер, Ишембай ҡалаһы:
– Хәҙер аҙыҡ-түлектең сифаты ныҡ хөртәйҙе. Совет осоронда улай түгел ине. Бына мин магазинда берәй ашамлыҡ алам тиһәм, уның составын белә алмай бер булам. Тотош химия бит! Әллә ниндәй кеше аңламаҫлыҡ хәрефтәр, баш етмәҫлек формулалар яҙып ҡуялар. Яңыраҡ баҙарҙан колбаса алып ҡайттым. Ул Ырымбур өлкәһенән килтерелгән. Тик шул тиклем тәмһеҙ булып сыҡты. Был ризыҡ, күрәһең, иттән түгел, ә әллә ниндәй ҡушылмаларҙан етештерелгән. Ошондай хәлдәр йыш осрап тора, әммә бер туҡтауһыҙ ялыу менән йөрөп булмай бит.
Нурия ИБРАҺИМОВА, хужабикә, Дәүләкән районы:
– Рәсәйҙә тауар сифатын күҙәтеүгә иғтибар етмәй. Элгәре Контроль-ревизия идаралығы була торғайны. Етештереүселәр уларҙың килеп тикшереүенән дер ҡалтырай ине. Әгәр тауарың сифатһыҙ икән – шунда уҡ лавкаңды ябып та ҡуялар. Бөгөн ундай күҙәтеү юҡ. Эшҡыуарҙарҙың да төрлөһө бар. Ана шундай намыҫһыҙҙар арҡаһында халыҡ бөтәһенә лә ышанысын юғалта.
Әлиә ДӘҮЛӘТОВА, һатыусы, Белорет ҡалаһы:
– Мин аҙыҡ һатып алырға булһам, тәүҙә уның яҙыуына ҡарайым. “ГОСТ” тигән билдә торһа, ышанырға була. Тимәк, был тауар дәүләт стандартына ярашлы етештерелгән. Был нимәне аңлата? Әгәр консервала быҡтырылған ит эшләнә икән, уның нисә проценты ит, күпмеһе май икәне стандартҡа ярашлы билдәләнә. Ә инде ундай билдә ҡуйылмаһа, эшҡыуар үҙе нисек теләй, шулай етештерә. Ундағы консервала иттең яртыһынан да аҙ булыуы, ҡалған өлөшө әллә ниндәй ҡушылмалар менән тултырылыуы ихтимал.
Сәфинә ҒҮМӘРОВА, пенсионер, Әлшәй районы:
– Шөкөр, бөгөн әйбер юҡ тип зарланаһы түгел. Тик беҙҙең илдә халыҡ сифатҡа ҡарап түгел, ә кеҫәгә ҡарап йәшәй. Әгәр янсығың ҡалын икән, иң затлыһын, иң тәмлеһен һайлап алаһың. Ә инде кеҫәң таҡырыраҡ булһа, тәмһеҙерәге, сифатһыҙырағы менән хушһынырға тура килә. Барыһы ла кешенең матди мөмкинлегенә бәйле.