Профессор, педагогика фәндәре докторы Рафаэль Аҙнағоловтың “Иманың камилмы?” тигән мәҡәләһе йәнә уйла­нырға, берҙәм булырға саҡырҙы. Баш­ҡорт теленең киләсәген хәстәрләгән яҙ­ма­ға Интернет селтәрен ҡулла­ныу­сы­лар ҙа үҙ фекерен белдерҙе. “Би­та­рафбыҙ тип уйлаһам да, улай уҡ түгел, сөнки телебеҙ яҙмышы өсөн күп мил­ләт­тәштәребеҙ борсола. Әммә ябай ха­лыҡ нимә эшләргә кәрәклеген бел­мәй. Мин, мәҫәлән, балаларым менән тик баш­ҡортса һөйләшәм дә бит, ә артабан?! Милли кластар ябыла, үҙ ҡаҙаныбыҙҙа ғына ҡайнайбыҙ, “баш­ҡорт­мон!” тип күкрәк һуғып ҡына хөрмәт ҡаҙанып булмай”, – тигән бер милләттәшебеҙ.
Ысынлап та, ғорурлыҡ – бер, ә халыҡтың иртәгәһе мәнфәғәтендә аныҡ маҡсатлы ҡарар ҡабул итеү, файҙалы эш атҡарыу – икенсе. Балалар баҡсала­рында башҡорт төркөмдәре, милли уҡытыу программалары булдырыу, йәш быуынды тәрбиәләүҙә заманса алымдар ҡулланыу – телебеҙҙең киләсәгенә етди йоғонто яһаясаҡ алымдар. Баҫмабыҙҙың рәсми сайтындағы фекер-тәҡдимдәр ҙә халҡыбыҙҙың үҙ яҙмышына битараф түгеллеген күрһәтә. Гәзит уҡыусыларҙан артабан да хат-хәбәр көтөп ҡалабыҙ.