“Кеше оло йәшкә еткәс тә уның күңелендә мөхәббәткә, матурлыҡҡа, ижадҡа урын булһын. Ул һәр бер көндөң ҡәҙерен белеп, ҡыуанып йәшәһен, — тип һүҙен башланы яҡташыбыҙ, Башҡортостандың халыҡ шағиры, районыбыҙҙың почетлы гражданы Абдулхаҡ Игебаев. — Өйөбөҙгә ҡартлыҡ исемле “дуҫ” килде. Беҙ уның менән бергә йәшәйбеҙ. Һеҙгә лә килһә, ҡартлыҡ тигән таяҡҡа таянмағыҙ, уны йәнәш алып йөрөгөҙ!”

Халыҡ шағиры Абдул­хаҡ Игебаев менән уның тормош юлдашы Маһиҙә инәйгә әле 84 йәш. Улар шулай ҡартлыҡ тигән “дуҫтары” менән бергәләшеп көн күрә икән. Ләкин шағир ижадтан айы­рылмаған, киреһенсә, күңе­ле менән уға бирелгән: былтыр ғына “Беҙ баймаҡтар бит әле!” тигән шиғырҙар йыйынты­ғын сығарғайны, хәҙер инде “Ғүмер аяулы” исемендәгеһен ижад итә.
Һуңғы йылдарҙа һаулы­ғы ҡаҡшау сәбәпле, Аб­дулхаҡ Игебаевтың тыуған яҡтарына ҡайтҡаны юҡ тиерлек. Шуға ла йәнтөйәген ныҡ һағынып йәшәй. Радио тул­ҡындарынан йә телеви­зорҙан “Баймаҡ” тигән һүҙ­ҙе ишетеү менән йөрәге ашҡынып тибә башлай. Баймаҡ яңылыҡтары ме­нән хәбәрҙар ул. Яҡшыларына шатланһа, йәй көндәрендәге ҡоролоҡ өсөн борсола.
Яңыраҡ район хакимиәте башлығы Илшат Ситдыҡов, райондың ҡатын-ҡыҙҙар сове­ты рәйесе, үҙәк китапхана директоры Луиза Дәүләтшина һәм Өмөтбай мәктәбе директоры Илдус Зәй­нуллин шағирҙың өйөндә булды. Әҙип көтөлмәгән осрашыуға бик ныҡ шатланды, көндәлек тормошо, донъя­уи уйҙары, киләсәккә пландары менән уртаҡлашты. Бындай ос­рашыуҙарҙың йышыраҡ булыуын теләне. Илшат Хәмит улы, үҙ сиратында, арҙаҡлы яҡташыбыҙға фә­һемле шиғырҙар ижад ит­кән өсөн оло рәхмәт һүҙҙә­рен еткерҙе. “Беҙ йәш быуынды һеҙҙең өлгөгөҙҙә тәрбиәләйбеҙ”, — тине ул.
Эйе, арҙаҡлы яҡта­шыбыҙҙың ижады тәрбиәүи йәһәттән баһалап бөткөһөҙ. Уның һәр шиғыры оло көскә эйә: әсәйҙәрҙе данлай, тыуған ерҙе һөйөргә, олоно — оло, кесене кесе итеп һанларға өйрәтә.