Өфөлә “Йәшел энергетика” тигән XIV Рәсәй форумы башланды. Быны энергетика өлкәһендәге иң мөһим ваҡиғаға тиңләйҙәр. Унда илебеҙҙең төрлө мөйөшөнән бихисап ҡунаҡтар саҡырылған. Башҡортостан Президенты Рөстәм Хәмитовтың ҡатнашыуы сараға мәртәбә өҫтәне.
“ВДНХ-Экспо” комп­лек­сының фо­йе­һында бай йөк­мәткеле күр­гәҙмә ойош­то- ролған. “Contalia” (Мәскәү ҡалаһы), “Прибор” (Санкт-Петербург), “Холдинг Беломо” (Минск), “Каскад” (Чебоксар), “Энергетик” (Вот­кинск ҡалаһы, Удмурт Республикаһы), “АРСО” (Өфө), “Электроаппарат” (Дәү­ләкән), шулай уҡ Баш­ҡорт дәүләт аграр университеты, Өфө дәүләт нефть техник университеты, Өфө яғыулыҡ-энергетика кол­леджының стенды янында халыҡ бигерәк тә күп ине.
Күргәҙмә менән таныш­ҡандан һуң, барыһы ла пленар ултырышҡа йыйылды. Һөйләшеүҙе Башҡортостан Хөкүмәте Премьер-министры урынбаҫары Дмитрий Шаронов алып барҙы.
Рөстәм Зәки улы һүҙ алып, сираттағы форумдың республикабыҙҙа үтеүе­нең осраҡлы түгеллеген билдәләне. Сөнки беҙҙә тулайым төбәк продукты йылдам үҫешә, Башҡортостан Рәсәй кимәлендә был йәһәттән алдынғы субъект һанала.
– Энергетика форумы тармаҡты үҫтереү буйынса эшлекле һәм нәтижәле ҡарарҙар ҡабул итеү өсөн мөһим майҙансыҡ ролен үтәй, – тине республика башлығы. – Энергияны һаҡ­сыл, файҙалы тотоноу йәшәйешебеҙҙә көнүҙәк урын­ды биләй. Ябай халыҡ йылылыҡ һәм электр энер­гия­һын ҡулланғаны өсөн мөмкин тиклем әҙ түләһен. Беҙ шуны теләйбеҙ.
Рөстәм Хәмитов, донъя­лағы ҡайһы бер көтөлмәгән үҙгәрештәргә туҡталып, үҙе­нең фекерен белдерҙе, шулай уҡ ил иҡ­ти­садындағы яңылыҡтар ме­нән таныш­тырҙы, Рәсәйгә ҡа­рата индерелгән иҡтисади санкциялар хаҡында ла әйтте.
Президенттың һүҙҙәренә ҡарағанда, бизнесҡа һәр саҡ власть менән йәнәш тороу зарур, үҙ-ара эшмәкәрлек ышанысҡа ҡоролорға тейеш, улар бер-береһенә ярҙам иткәндә генә алға китеш күҙәтеләсәк. Ул республика­быҙҙа ышаныс­лы эре энергетика система­һының бу­лы­уын һыҙыҡ өҫ­төнә алды. Шул уҡ ваҡытта өр-яңы һулыштың кәрәклеген дә иғтибар үҙәгенә ҡуйҙы.
– Әле беҙҙә пар һәм газ ҡоролмаһы үҙәге яңыртыла, әммә был ғына аҙ, энергия сығанағы объекттарын төҙөү тураһында күберәк уйла­ныр­ға тейешбеҙ, – тине ул.
Президент ҡояш, ел тарафынан алынған электр энергияһы хаҡында ла һөй­ләп, альтернатив энергети­ка­ға ла туҡталды.
Сара 24 октябрҙә тамамлана.