Энергетика өлкәһендә йылдың иң мөһим ваҡиғаһы — ХIV Рәсәй энергетика форумы — башланды. Быйыл халыҡ-ара кимәлгә күтәрелеп, ул Шанхай хеҙмәттәшлек ойошмаһында Рәсәй рәйеслегенең планына индерелгән.

Сараны төп ойоштороусы булып республикабыҙ Хөкүмәте менән Баш­ҡортостан күргәҙмәләр компанияһы сығыш яһай. Ул Рәсәй Феде­рация­һының Энергетика, республиканың Сәнәғәт һәм инновация сәйәсәте министрлыҡтары һәм Башҡорт­остан Сауҙа-сәнәғәт палатаһы ярҙамы менән үтә. Генераль бағыусыһы — “Баш­ҡорт­остан электр селтәрҙәре” компанияһы асыҡ акционерҙар йәмғиәте.
Форумдың маҡсаты — энергияны һаҡ­лау һәм уның һөҙөмтәлелеген арттырыу йәһәтенән бөгөн мөһим булған “Йәшел энергетика” йүнәлешендә хеҙ­мәттәш­лекте үҫтереү. Йыйын програм­маһына ярашлы уҙған саралар ҡатна­шыусыларға тәжрибә уртаҡ­лашыуҙа, алдынғы про­екттарҙы тор­мошҡа ашырыуҙа, бәй­ләнеште нығы­тыуҙа ҙур ярҙам буласаҡ.
Программаға шулай уҡ халыҡ-ара конференциялар инә. “Энергияны һаҡлауҙа предприятиеларҙың мөһим проблемалары”, “Яңыртылған энергия сыға­наҡтары: ҡояш, ел һәм һыу” тигәндәре һәр ҡайһыһында ҡыҙыҡһыныу уятырлыҡ.
Барлығы ун биш тема буйынса төрлө сара үтеп, мөһим мәсьәләләр күтәреләсәк. Рәсәйҙең 25 төбәгенән, башҡа илдәрҙән 150-нән ашыу предприятие яңы техника өлгөләрен күрһәтә.
Форумдың тағы бер мөһим яғы — дәүләт һәм бизнес вәкилдәре араһында эшлекле һөйләшеү. Һуңынан резолюция ҡабул ителеп, энергетика өлкәһендә көнүҙәк булған мәсьәләләрҙе атҡарып сығыу юлдары билдәләнәсәк.